امان مستعار

بصت للورقة المكتوب فيها اسم أبوها “حسان”، و ابتسمت ابتسامة خبيثة وهي بتهامس نفسها:

ـ خليهم يدوروا على الصفحة المفقودة… وأنا اللي همشيهم على العجين ما يلخبطوهوش.

رجعت الورقة لشنطتها بثبات وخرجت بخطوات هادية، وكأنها مجرد مهندسة غريبة تمامًا عن العيلة وأسرارها .
ـــــــــــــــــــــــــــــــــــــــــ
كان التوتر في بيت محمود النوحي بيغلي على نار هادئة، جاهز للانفجار في أي لحظة.

قاعدة نادية في الصالة بتحاول تراجع بعض الحسابات، وبتهدي في الحفيد مالك، لما اتفتح الباب فجأة، ودخل حسام، زوج مريم، بخطوات سريعة. كان وش حسام مشدود، وملامحه طافحة بالتعب والضغط، وهو ماسك في إيده رزمة أوراق ومطالبات مالية تخص علاج مالك واشتراكات مدرسته.

رمى حسام الورق على الترابيزة بعصبية مهدودة، ونطق بنبرة صريحة ومجروحة قدام محمود:

– يا عمي محمود… أنا خلاص جبت آخري. الضغط بقى فوق طاقتي وطاقة أي بني آدم. أسعار العلاج والمتابعات في المركز الفاخر ده بتاكل أكتر من نص دخلي، والالتزامات كترت، و مبقتش عارف ألاحق على إيه ولا إيه .إيجار ودراسة وعلاج… وأنا مش عايز مريم تحس إننا عاجزين.

اتعدل محمود في قعدته، وبص له بنظرة حادة، فرد حسام وهو بيهز رأسه بقلة حيلة وبنبرة عفوية:

– ولولا إن دكتور سليم، كتر خيره، اتدخل وعمل لنا تخفيض محترم في المصاريف بطلب شخصي من ليان… أنا ما كانش هيبقى قدامي غير إني أوقف علاج الولد.

في اللحظة دي… اتجمد الهواء في الصالة.

وضع محمود الورقة على الطاولة ببطء، وانتفخ وجهه بالغضب، وقام واقف حيل طوله، وعيونه بتطلع شرار، وهو بيصرخ بصوت هز جدران البيت:

– إيه اللي أنت بتقوله ده يا حسام؟! تخفيض من مين؟!.. من دكتور سليم؟! هو أنتم قبلتم حسنة وعطف من الجدع ده من ورا ضهري؟!

اتخضت نادية وقامت بسرعة تحجز بين جوز بنتها وبين محمود اللي كان بيتراشف من شدة الغضب:

– اهدى يا محمود، صلي على النبي .الراجل ما قصدش حاجة وحشة… ده دكتور الولد وبيراعيه، ومن يوم ما عرفناه وهو راجل محترم و ابن ناس، وما شفناش منه غير كل خير، ومساعدته مش معناها إن وراها مصيبة.

رد محمود بنبرة حادة، وصوته كان بيتلعثم ويهتز بوجع وقهر سنين مكتوم:

– يا نادية الس\كينة اللي بتدبحنا أنتم شايفينها احترام. سليم ابن فؤاد… وابن أخو كمال الشافعي. أنتم فاهمين يعني إيه اسم الشافعي يدخل بيتي تاني؟!