امان مستعار
توقف محمود ونظر إليها طويلًا:
– عشان شفت عربيته تحت بيتي … وعرفت إن الماضي وصل لحد بابنا.
وفي هذه اللحظة بالذات… رن هاتف محمود بصوت حاد قطع نزيف الكلام. نظر إلى الشاشة، فتغير وجهه تمامًا؛ كان رقمًا مجهولًا. تردد لحظات، ثم فتح الخط بصوت متهدج:
– ألو؟
لم يسمع الطرف الآخر سوى ثوانٍ قليلة، لكن صوتًا منخفضًا وغريبًا عبر الهاتف قال بنبرة مهددة:
– لو كنت لسه بتدور ورا حسان… يبقى لازم تعرف إن فيه ناس مش عايزاك توصل للحقيقة. بعض القبور لو اتفتحت… مش كل اللي جواها هيكون ميتين و بس .
انقطع الاتصال. ظل محمود ممسكًا بالهاتف دون حركة، والدم يسحب من وجهه. اقتربت ليان منه برعب:
– بابا… مين ده؟ إنت وشك اتغير ليه؟
رفع عينيه إليها بضعف لم تعهده منه قط، وقال بصوت حزين:
– محدش… ادخلي أوضتك يا ليان. من فضلك اسمعي كلامي المرة دي.
وقفت ليان مكتوفة الأيدي، ثم سألته بكسرة أمل أخيرة:
– بابا… أنا هبعد عن الدكتور سليم لو ده هيطمنك… بس عايزة أعرف حاجة واحدة… هو أذى حد؟
صمت محمود طويلًا، ثم قال:
– سليم نفسه… لأ. بس المشكلة مش في سليم يا ليان… المشكلة في العيلة دي، وفي اللي حواليه.
تراجعت ليان خطوة إلى الخلف، ومسحت جبهتها بظهر يدها المرتعشة، ونظرت لأبيها بذهول متصلب:
– طب حسان مين يا بابا؟ و كان شغال فين ؟ إنت عمرك ما قلت لنا إنك تعرف عائلة الشافعي، ولا عمرك ذكرت الاسم ده في بيتنا.
كان محمود يتنفس بصعوبة، صدره يعلو ويهبط كمن ركض مسافات طويلة في صحراء قاحلة. جلس على طرف الكنبة ببطء شديد، ووضع كفيه على ركبتيه اللتين كانتا ترتجفان بوضوح، وقال بنبرة مهدودة، مبحوحة، طالعة من قعر سنوات من الصمت:
– مش كل حاجة بتتقال يا ليان… فيه حاجات بنسيبها مدفونة عشان نعرف نعيش، عشان نعرف نربيكم ونأكلكم لقمة حلال من غير ما تطولنا نار ناس ما بترحمش.
قربت نادية بخطوات متثاقلة، وقعدت جنبه على ركبتيها، ومسكت إيده الناشفة ودموعها نزلت:
– محمود… في إيه يا خويا؟ رجّعتنا للسنين السودا دي ليه؟ مش اتفقنا ننسى ونقفل الصفحة دي خالص؟
يتبع
الفصل الخامس 💔
«حين يصبح الأمان موضع شك» 💜
مقدمــــــــــــــة الفصـــــــــل
سليــــــــــــم وليــــــــــــان 💔🔥
ليس كلُّ من نحبهم يمنحوننا الأمان… فبعضهم يصبح الأمان الذي طالما بحثنا عنه، ثم يتحول دون قصد إلى مصدر خوفنا الأكبر، وبعضهم نمنحه قلوبنا بصدق، فيقابلنا بالشك وكأننا متهمون في جري\مة لم نرتكبها.
