امان مستعار

ساد سكون مرعب، فكمل محمود وهو بيضرب صدره بوجع، وعيونه دمعت:

– دول أخدوا مني كل حاجة في الماضي… أكلوا شقا عمري، و داسوا على اسمي، و تسببوا في قتل حسان المحاسب بدم بارد. مش بس كده… دول لفقوا التهمة ليا ولحسان الميت عشان يغطوا على وسخهم ويهربوا بالحرام.

وفي اللحظة دي بالذات… كانت ليان خارجه من اوضتها بعد ما جاهدت نفسها متروحش تقابل سليم .

وقفت عند الباب، والكلمات نزلت عليها زي الصاعقة اللي شلت حركتها. عينيها اتسعت بصدمة زلزلت كيانها. قربت من الصالة بخطوات مرعوبة، وصوتها طلع مخنوق، مقطوع، ومش مصدق:

– بابا… أنت بتقول إيه؟.. سليم انا بصدقه من  عيونه؟

تطلع محمود لبنته بحزن يدمي القلب، ورجعت عينيه تتكسر قدام دموعها، فقرب منها ومسك إيديها اللي بتترعش، وقال بنبرة مليانة خوف أبوي قاتل:

– أيوه يا بنتي…. والنهارده لما ألاقيه بيلف ويقرب منك أنتِ بالذات، ويحاول يستطفلك ويحملك جميلة… قلبي بيموت من الخوف. أنا خايف يكون قربه منك ده وراه حاجة في نفس عيلته… خايف يكون بيلعب عليكي عشان يضمن إن الملف القديم يفضل مدفون، وما حدش فيكم يفتح باب الجحيم اللي قفلوه بدمنا .حسان مات عشان عرف الحقيقة، وأنا فضلت ماشي بعاهة في رجلي وقلب مكسور عشان أسكت… مش هسمح لهم ياخدوكي مني أنتِ كمان.

وقفت ليان في نص الصالة، والدموع بتنزل من عينيها بسكوت حارق. افتكرت كلام سليم في العربية وهو بيحاول يطمنها ويقول لها إن الأمان موجود… افتكرت كل نظرة وكل كلمة، وفجأة كل حاجة اتهزت كأنها زلزال.

صوتها طلع مهزوم وهي بتبص لأبوها:

– بس يا بابا… سليم قال لي إن فيه سر قديم، وإنه مش فاهمه كامل وبيدور عليه… هو مش أبوه، و مش معني إن عيلته أذتك، إنه بالضرورة خاين.

زعق محمود بحسم، وهو شايف دفاعها عنه:

– إنتِ بدأتي تدافعي عنه يا ليان
الحقيقة دي لو قربتي منها أكتر هتدمرك… هتلاقي نفسك واقفة في النص بين قلبك وبين الحق. ابعدي عن سليم الشافعي… من النهارده محدش يقبل منه حاجة، ولا حد يعتب المركز ده تاني.

رجعت ليان خطوتين لورا، ومسحت دمعتها وهي بتبص لأبوها بعيون مليانة وجع وتشتت:

– مش هقدر أكرهه لمجرد إنك طلبت مني أكرهه يا بابا… بس أوعدك، مش هعيش خايفة، ومش هسيب الحقيقة مستخبية تحت خوفنا طول العمر.