امان مستعار

تراجع كمال في كرسيه ببطء و تمتم:
– الراجل ده و عيلته طول عمرهم عايشين على قد حالهم و بيجروا على قوت يومهم… بس مجرد وجود اسمه في أوراق حسان خطر. لو الأوراق دي اتفتحت أو حد نبش ورا اللي حصل زمان، السر اللي دفناه حيطربق البيت فوق دماغنا كلنا

في اللحظة دي، مقبض الباب اتقلب ودخل فؤاد (أبو سليم).

دخل بهيبته الصلبة اللي بتفرض نفسها من غير ما يرفع صوته. بص لأخوه كمال وبعدين للملف اللي في إيده، وقفل الباب وراه بهدوء مريب.

قرب فؤاد من المكتب ببطء، وسأل بصوت حاد:
– بتدور في ملفات إيه يا كمال؟

حاول كمال يحافظ على ثباته قدام أخوه الكبير:
– ملفات المشروع القديم يا فؤاد… لقيت اسم محمود النوحي في أوراق الحادثة.

توقف فؤاد، وعينيه اتغيرت بصرامة حادة:
– ومحمود ده إيه اللي يخليك تفتكره دلوقتي؟ راجل غلبان و عيلته طول عمرها بتجري على أكل عيشها وما يعرفوش حاجة عن اللي جرى.

رد كمال بنبرة حذرة وذكية وهو باصص لأخوه:
– عارف إنه غلبان وما حيلتوش حاجة… بس حسان المحاسب قبل ما يموت كتب اسمه في التقرير. محمود كان الشاهد الوحيد على اللخبطة اللي حصلت في الحسابات قبل الحادثة. أنا مش خايف من محمود كشخص ولا من عيلته الغلبانة… أنا خايف من السر اللي المظلومين دول شايلينه من غير ما يفهموا قيمته خايف لو حد من ولادنا أو حد من برة فتح الملف القديم، يعرف إن حادثة حسان مكانتش مجرد قضاء وقدر، وساعتها ابنك سليم ومشروعه و العيلة كلها هيدفعوا التمن.

ساد الصمت في الأوضة، ونظر فؤاد لأخوه بنظرة ثقيلة تحسها إن الماضي فعلا بدأ يرمي ضله من جديد على العائلة.
ــــــــــــــــــــــــــــــــــــــــ
من اليوم اللي خرج فيه مالك من المركز، ما خرجتش الحكاية من دماغ ليان بنفس السهولة.

كانت فاكرة إن أول ما ابن أختها يرجع البيت، هترجع هي كمان لحياتها الطبيعية، لمحاضراتها، و لمذاكرتها، و للبيت اللي كانت تفاصيله أحيانًا بتخنقها و أحيانًا تديها إحساس غريب بالانتماء، خصوصًا مع وجع أبوها محمود والجبل اللي بيميل بيه. لكن الغريب إن كل مرة كانت تعدي فيها من قدام المركز الطبي، كانت عينيها تروح تلقائيا ناحية المبنى… ناحية الدور اللي عرفت فيه سليم.

مش سليم الطبيب وبس… لكن الراجل اللي دخل عليها في أكتر لحظات خوفها، وما حاولش يبيع لها وهم. الراجل اللي خوفها في البداية ببروده، وبعدين طمّنها من غير ما يقول لها كلام حلو. ومن يومها، بدأت زياراتها للمركز تزيد.