اللجنه2
نسرين عينيها لمعت من الغضب وقالت: “هيتخطبلي غصب عنه.. وهينساها.. ”
وبصت ناحية الصالون من بعيد وشافت وردة قاعدة جنب مامتها وأدهم قاعد قصادها بيبصلها من بعيد وهو مقهور، وقالت في سرها: “لازم أخلص منك يا وردة”.
وردة قاعدة جنب مامتها طول القعدة وهي مضايقة وموطية راسها ومش بتتكلم، وأدهم قاعد في مكانه الناحية التانية وهو بيبص عليها بعصبية وغيرة، كل ما يشوفها بتمسح دمعتها يتعصب أكتر.
القعدة بتنتهي على خير وبيمشوا بعد ما الجد والعميد حددوا ان موعد الخطوبة الرسمي بعد أسبوع.
العيلة كلهم بيرجعوا البيت، كل واحد دخل أوضته.
وردة دخلت أوضتها غيرت الفستان الأسود ولبست بيجامة ناعمة لونها بينك، وفردت شعرها وعملت ماسك على وشها لونه أبيض عشان تهدي وشها من العياط.
فجأة سمعت صوت خبط على الباب.
فكرت انها مامتها وقالت وهي قاعدة على السرير: “ادخلي يا ماما”
الباب اتفتح ودخل أدهم وقفل الباب وراه.
وردة اتنفضت من مكانها أول ما شافته وهي بتنطق اسمه بصدمة: “أدهم؟! انت بتعمل ايه هنا؟ اطلع برا!”
أدهم أول ما شافها وهي حاطة الماسك الأبيض على وشها وشعرها منكوش، كان عايز يضحك على شكلها بس مسك نفسه، وبص لها بهدوء وقال بمكر عشان يغيظها:
“هي وردة بنت عمي فين؟”
وردة بصت له بصدمة وقالت: “أنا وردة؟!”
أدهم قرب خطوة وقال وهو بيكتم ضحكته: “لا انتي مش وردة.. وردة بنت عمي القمر اللي كانت لابسة فستان أسود النهاردة .. انما انتي مين؟ عفريتة ولا ايه؟”
وردة حطت ايدها على وشها بكسوف وقالت: “أدهم اطلع برا بقى.. ايه اللي جابك أوضتي؟”
أدهم قفل الباب بالمفتاح وقرب منها وقال وصوته اتحول لجد: “جاي أسألك.. انتي كنتي مبسوطة أوي وانتي واقفة مع شادي في الجنينه ليه؟”
وردة رفعت راسها بعناد وقالت له وهي بتحاول تبان قوية: “آه كنت مبسوطة.. عشان دي خطوبة ابن عمي.. المفروض أبقى مبسوطة ولا أعيط؟”
أدهم قرب منها أكتر وعينه في عينيها وقال بجدية: “مش هيحصل يا وردة.. الخطوبة دي عشان نلم موضوع الصورة وبس.. كلها كام شهر وهفسخها”
وردة ضحكت بوجع وقالت: “والصورة دي أكبر دليل ان انتوا بتحبوا بعض.. انت ونسرين لايقين على بعض أوي.. دكتورة زيك.. مش انا”
أدهم سكت ثانية وبص لها بحب وقال بصوت واطي: “محصلش.. أنا عمري ما حبيتها.. عشان أنا بحب واحدة تانية.. واحدة مجنونة ومجنناني معاها”
