اللجنه2
وفي اللحظة دي سمعوا صوت عالي وغاضب من وراهم بيقول:
“انتوا بتعملوا ايه هنا؟!”
لفوا بسرعة لقوا أدهم واقف وراهم وعينيه بتطلع نار وباصص لشادي بغضب وباصص لوردة بصدمة انها واقفة قريبة كده من شادي.
بعد صوت أدهم العالي بتيجي نسرين جري من وراه وهي قلقانة وتقول: “في ايه؟ في ايه يا أدهم؟ صوتكم عالي ليه؟”
شادي رد بابتسامة هادية وطبيعية وقال: “في ايه يا جماعة.. انا ووردة كنا بندردش شوية بس.. الجو جوه كان خنقة فخرجنا ناخد شوية هوا”
أدهم كان واقف متعصب ووشه أحمر وعينيه مش بتتشال من على وردة، غيران ومش قادر يخبي غيرته، ايديه مقفولة جامد.
وردة أول ما شافت أدهم ونسرين اتوترت ورجعت خطوة لورا وبعدت عن شادي.
نسرين بقى أول ما شافت المنظر ده، شافت غيرة أدهم على وردة وشافت شادي مهتم بوردة، حست ان دي فرصتها الذهبية، دي فرصتها انها تدخل اخوها شادي في حياة وردة وتخلص منها وتخرجها من حياة أدهم للأبد.
نسرين ظهرت حماسها فجأة وضحكت وقالت وهي بتبص لوردة وشادي: “الله.. واضح اوي ان انتي وشادي متفقين.. من أول ما دخل وانتوا بتتكلموا وعينيكم بتلمع.. شكلكم لايقين على بعض أوي”
وردة اتصدمت من كلامها وقالت: “ايه؟ لا.. احنا..”
أدهم بص لنسرين مصدوم من اللي بتقوله، وشادي ابتسم بكسوف وبص لوردة.
نسرين كملت وقالت بخبث وهي ماسكة دراع أدهم: “بجد يا أدهم مش ملاحظ؟ وردة وشادي لايقين على بعض جدا.. مش كده يا أدهم؟”
أدهم مقدرش يمسك نفسه أكتر من كده، صوته علي وهو بيزعق لوردة قدامهم وقال: “وردة! ادخلي جوه اقعدي جنب والدتك ومتتحركيش من جنبها.. فاهمة؟”
وردة اتخضت من صوته العالي قدام الناس، عينيها دمعت، واتحركت بسرعة ودخلت جوه وهي موطية راسها من الكسوف.
أدهم دخل وراها على طول وهو لسه متعصب.
شادي واقف بره بيضحك ومش فاهم حاجة، قرب من أخته اللي واقفة مضايقة ووشها مقلوب، هي فاهمة كويس أوي ان دي غيرة أدهم على وردة وان اللي بيحصل ده مش طبيعي.
شادي قرب من أخته وهمس لها وقال: “واضح انه بيحب بنت عمه على فكرة.. انتي مش واخدة بالك ولا ايه؟”
نسرين بصت له بغيظ وقالت وهي سنانها بتجز: “اخرس يا شادي.. ملكش دعوة”
شادي ضحك وقال: “يا بنتي ده باين أوي.. ده كان هياكلني بعينه من شوية.. هو انتي هتتخطبيله ازاي وهو بيحب واحدة تانية؟”
