دكتور النسا وحرمه

حاول التملص من يديه وهو يصرخ به:

_أيه دا أنت اتجننت انا دكتور تخدير محترم…

جذبه خلفه بالقوة والأخر يرفع صوته:

_في سوء تفاهم يا حضرت، أسمع بس مينفعش كدا..

سريعاً ما وضعت الأغلال حول معصمه ثم وضع بسيارة الشرطي ليزف لقسم الشرطة، أما عنان فما أن تأكد من خروجهم حتى خرج يتسلل من خلف الحائط الصغير بجوار العمليات ليتجه سريعاً لغرفتها، ما أن فتح باب الغرفة حتى تخشبت قدميه من شدة ما تعرض له، فتح عينيه ليحاول رؤية ما يحدث ولكنه وجد ما يعيق رؤيته، انتشل ما وضع على وجهه فوجد دلو (جردل) كبير الحجم قد دفنت رأسه به، وجسده بأكمله يرتجف من شدة البرودة بعدما غمرته مياه هذا الدلو الذي سقط ليغرقه، تطلع أمامه فوجدها تنظر إليه وهي تقول بخيبة أمل:

_هو أنت دا أنا افتكرت البوليس جيه فكنت عايزة أعقمهم قبل ما يدخلوا عليا، انا نفسة وماليش أتعرض لحالات عندها وباء الكورونا…

ثم القت عليه نظرة تفحص وهي تسأله باستغراب:

_أيه اللبس دا أنا ولدت خلاص يا حبيبي روح أقلع لبس الجزارة دا..

أفرغ المياه العالقة بفمه وهو يغلق الباب من خلفه ويقترب منها بنظراتٍ محتقنة، جذب الملاءة ثم صعد فوق الفراش ليلفها حول النجفة الصغيرة المعلقة بسقف الغرفة، بلعت ريقها بتوتر وهي تشير لها بيدها:

_أوعى هتعمل أيه!… متق..تلنيش يخربيتك مش جاهزة الوقتي نفسي أغير البامبرز للواد وأزعقله كدا زي الأمهات أحنا لسه مدخلناش مرحلة العمالق…

لف الملاءة حول عنقه وهو يشير لها ببسمة واسعة:

_ادخليها انتي لوحدك انا خلاص إخترت المرحلة اللي هدخلها عشان أرتاح منك ومن عمايلك السودة..

وألقى بالجزء الاخر من الملاءة بالاتجاه الأخر وهو يحاول شنق ذاته، فزعت للغاية فأسرعت اليه وهي تسأله بصدمة:

_يخربيتك هتعمل ايه يالا!… عيب يا حبيبي دا أنت دكتور محترم وليك اسمك..

قال وهو يدعي بأنه سيلقي ذاته من على الفراش:

_هو انتي خليتي فيها احترام، بتبلغي عني يا اسراء!! ، أنا همو.ت وأرتاح منك خالص، أنا غلطت، غلطت ولازم اتحاسب على الغلطة دي أنا اتجوزت، اتجوزت يا ناااس بس الجواز غلطة وأنا معرفش، الولادة غلطة وانا برضو معرفش، الله اعلم الجاي ايه يبقى أتوكل على الله بكرامتي ومن اولها..

تشبثت بقدميه وهي تنتحب قائلة:

_هتسيبني وتروح فين يا غالي دانت قلبي ياض وكتاب الله..