وجع الهوى بقلم ايمى نور ٤

اسرعت زاهية تهز راسها له بالايجاب فورا ليرتفع صوت قدرية بلهفة سائلة
: تحب اكون معاهم انا كمان يا جلال

اجابها بحزم دون ان يلتفت لها متوجها الى الباب
: اظن انا قلت عاوز مين بالظبط غير كده محدش يدخل المكتب غير اللى طلبتهم

تعالت شهقت زاهية بصدمة وهى تتطلع بتساؤل الى قدرية الواقفة بجمود ووجه شاحب بعد كلمات جلال لها بينما يسرع هو ناحية الباب بخطوات سريعة لكنه توقف بجوار ليله المتابعة بصمت وذهول ما يحدث تلتقى عينيه بعينيها فترى بداخلهم نظرة من خيبة الامل ومعها شيئ اخر لم تستطع التعرف عليه موجهين لها قبل ان يتحرك مرة اخرى مغادرا تتبعه هى الاخرى بخطوات مثقلة حزينة
****************
: شوفتوا علشان الست هانم يخصمنى انا!!! ….انا امه يقولى متدخليش عليا اوضة المكتب

ارتفعت ابتسامة صفراء فوق شفتى اميرة وقد كانت تجلس على يمينها بكامل زينتها اما حبيبة فقد زفرت بضيق وعدم تصديق لكلمات والدتها الظالمة لتلتفت لها قدرية بحدة تصرخ بها
: مش عاجبك كلامى يا ست حبيبة….ايه زعلانة اووى على حبيبة قلبك ومش همك زعل امك

هزت حبيبة راسها بقلة حيلة ناهضة من مكانها تهتف
: انا هقوم من هنا احسن اروح اشوف بيعملوا ايه فى المطبخ

طوحت قدرية بكفها لها بعدم اهتمام تعاود الالتفات الى غرفة المكتب تطالعها باهتمام وهو تضرب بكفيها فوق ركبتها تهتف بغل
: اه يا نارى…دى عمرها ماحصلت ان جلال يكلمهم فى حاجة ومكنش انا موجودة معاهم فيها

اميرة وهى تتطلع الى اظافرها قائلة بخبث
: معلش…ماهو دايما كل حاجة وليها اول

تجمدت حركة قدرية تلتفت الى اميرة ببطء تهتف بها بحدة وذهول
: تقصدى ايه بكلامك ده يا بنت اخويا

اميرة وهى مازالت تتطلع الى اظافرها توليها اهتمامها تهز كتفها
: مقصدش يا عمتى….ما تخديش على كلامى…. ركزى انت مع جلال وسيبك منى

همت قدرية بالرد عليها ولكن اتى صوت بكاء سلمى وخروجها المفاجئ من الغرفة وهى تجرى ناحية الدرج كالعاصفة تلحقها زاهية هى الاخرى لكنها توقفت حين نادتها قدرية تسألها بلهفة عما جرى فتجيب زاهية بصوت هادئ ولكنه حزين
: جلال وصبرى خلاص حددوا كتب كتاب سلمى على على ابن اخويا يوم الخميس الجاى

اتسعت عين قدرية بذهول تصرخ مستنكرة
: وزاى ده يحصل من غير حد ما يعرفنى ويدينى خبر…. من امتى حاجة زى دى بتتحصل من غير علمى؟!