وجع الهوى بقلم ايمى نور ١

:هروح اعمل القهوة واحضر الفطار

ثم اتجهت ناحية المطبخ بخطوات واثقة رشيقة تتبعها الاعين حتى اختفت عن الانظار لتهتف سلمى بغل
:شوفتوا قلة ادبها لو بس تسبونى عليها اعرفها مقامها..

اسرعت حبيبة قائلة بهدوء
:انتى اللى غلطتى من الاول مكنش ليه لازمة تدخلى نفسك

جزت سلمى فوق شفتيها بغيظ ثم التفتت ناحية قدرية والتى جلست فوق مقعدها بوجه صارم وامارات التفكير الشديد تبدو عليها قائلة بغضب
:شوفتى بنتك يا مرات عمى بتقولى ايه؟

التفتت لها قدرية بشرود وتفكير قبل ان تقول بحدة بعد لحظات صمت شاردة
:قومى انتى وهى من هنا روحوا صاحوا اللى لسه نايمين وسبونى لوحدى

سألتها حبيبة بقلق
:مالك يا ماما فى ايه؟

قدرية بصوت عالى نزق
:مفيش وقومى اعملوا اللى قلت عليه ومش عاوزة كتر كلام

نهضت حبيبة وسلمى ببطء يتبادلان نظرات قلقة حائرة ثم اتجهوا الى الدرج لتنفيذ امرها لتهمس قدرية تعقد حاجبيها وعينيها تلتمع بالشر
:ياترى فى دماغك ايه يا بنت صالحة سكوتك ده قلقنى ومخلينى اخاف منك ومبقاش قدرية اما كان سكوتك ده وراه مصيبة وكبيرة كمان
********************
:طيب اتكلم معاه انت يا جلال انت عارف فواز ما بيعملش حساب لحد الا ليك انت حتى انا مابيخافش ولا بيهمه منى

زفر جلال حانقا بعد كلمات عمه المتوسلة تلك فهو يكفيه مالديه من مشاغل وليس بحاجة لاخرى بطلها ابن عمه الطائش هو الاخر فبرغم تقاربهم فى العمر الا ان فواز زوج شقيقته بتصرفاته الهوجاء تلك تجعله منافسا قويا للاطفال فى تصرفاتهم جاعلا كل من حوله يقاسى ويعانى بسببه واولهم شقيقته المسكينة رغم انها لم تشتكى ولو بحرف

اعتدل فى جلسته محاولا الهدوء قائلا
: الموضوع ده بالذات مينفعش غيرك يا عمى يتكلم فيه فواز مش لازم يعرف انى عرفت حاجة عن الموضوع ده
كلمه انت وعقله وعرفه ان لو حبيبة عرفت انه بتسرمح هنا وهناك مش هتعدى الحكاية على خير ابدا قوله يعقل ويحافظ على بيته يا عمى

تنهد صبر بقلة حيلة قائلا بأسف
:حاضر يا بنى هكلمه واحاول اعقله وربنا يهديه ..
ثم نهض من مقعده يكمل
:اقوم انا اروح اشوف حصل ايه فى الارض الغربية والانفار خلصوا هناك ولا لسه

هز جلال راسه موافقا ليتحرك عمه عدة خطوات مغادرا ثم يلتفت اليه مرة اخرى يسأله بفضول
:عملت ايه فى موضوع الارض مع المغاربة مش ان الاوان نخلص من الموضوع ده بقى