فتحت عينى بصعوبه

فتحت عيني بصعوبة، ريحة البنج والمعقمات كانت قالية المكان، وصوت جهاز ضربات القلب بيصفر جمب ودني بنبضات هادية ومنتظمة. السقف كان أبيض هادي، مش الأصفر بتاع أوضتي. لفت راسي براحة وأنا حاسة إن جسمي كله متبنج ومفيش حتة فيا مش وجعاني، بس الوجع ده كان معاه راحة غريبة. أول حاجة عيني وقعت عليها كانت أمي، "الحاجة بهيرة"، واقفة جمب الشباك الكبير بتاع أوضة المستشفى، لابسة نظارتها الطبية، وماسكة تليفونها وبتتكلم بصوت واطي جداً بس كله حسم وقوة. "زي ما قولتلك يا متر.. الحجز التحفظي يتفعل من صباحية ربنا، وكل الحسابات البنكية بتاعته تتجمد، والفيلا بتاعة التجمع اللي باسمه وبفلوس بنتي يتغير كوالينها قبل الضهر.. مش عايزة هفوة واحدة.. الراجل ده يصحى الصبح يلاقي نفسه على الحديدة". قفلت التليفون ولفت وشها ليا، ملامحها الصارمة القاسية اللي الكل بيترعب منها في المحاكم اتدلت فجأة وبقت كلها حنية وهي بتجري عليا. مسكت إيدي اللي كان متعلق فيها المحاليل والدم، وبست رأسي: "حمد الله على سلامتك يا قلب أمك.. عشتي وشوفتي ابنك يا مريم.. زي القمر، شبهك وشبه جده الله يرحمه". دموعي نزلت من غير ما أحس، صوتي كان طالع بالعافية ومبحوح: "هو فين يا ماما؟ هو كويس؟ المشيمة.. والدكتورة.." أمي طبطبت عليا وثبتت المخدة ورا ظهري: "الواد زي الفل يا حبيبتي، في الحضّانة بس بيطمنوا على تنفسه وهيطلعوا ليكي كمان شوية. والدكتورة نادية عملت معجزة، ربنا ستر ولحقناكي في آخر لحظة.. نزفتي كتير بس الإسعاف اللي بعته كان معاه أكياس دم من الفصيلة بتاعتك، ودخلتي العمليات فوراً.. سيبك من كل ده دلوقتي، المهم إنك قمتي بالسلامة". سكتت شوية، وافتكرت أحمد، النغزة اللي في قلبي كانت أقوى من وجع القيصرية.. سألتها وعيني في الأرض: "وأحمد؟" نظرة أمي اتحولت لكتلة نار، ابتسمت ابتسامة باردة تخوف: "أحمد؟ أحمد نايم في العسل دلوقتي.. فاكر إنك بتولدي في مستشفى حكومي ومرمية في الطوارئ، ورايح يحتفل مع أخته السنيورة بفلوس شقاكي اللي دفعوها للبلطجية بتوع القمار.. بس أنا رتبتله مفاجأة العمر.. أنا مش هسجنه بس يا مريم، أنا هخليه يتمنى السجن وميطلهوش.. نامي وارتاحي دلوقتي، عشان بكرة الصبح العرض هيبدأ، وعايزاكي تتفرجي وتتبسطي". في نفس اللحظة دي، في كافيه غالي جداً في منطقة الشيخ زايد، كان أحمد قاعد وحاطط رجل على رجل، بيشرب سيجار وبيضحك بأعلى صوته مع أخته دعاء، اللي كانت قاعدة حاطة ميكب كامل ولابسة براندات، ومفيش على وشها أي أثر للخوف أو الرعب اللي أحمد حكاه. "أنا مش عارف من غيرك كنت هعمل إيه يا أحمد.. بجد أنت أنقذتني، الراجل بتاع مكتب المراهنات ده كان باعتلي ناس تحت البيت وكانوا هيعملوا فضيحة ويهدوا الدنيا"، دعاء قالتها وهي بتشرب عصيرها ببرود. أحمد نفخ الدخان في الهواء وقال بثقة وغرور: "عيب عليكي يا بنتي، إنتي أختي الصغيرة، يعني عرضي وشرفي.. أنا مقبلش إن حد يمس شعرة منك.. مريم دي كانت فاكرة نفسها هتمشيني بكلامها، كل شوية 'عملية خطيرة ومستشفى خاص'.. الستات بتوع اليومين دول بقوا فرافير، زمان أمهاتنا كانوا بيولدوا في الغيط ويقوموا يطبخوا.. أنا قولت لها اتصرفي وروحي القصر العيني، وهناك الدكاترة هيولدوها ببلاش.. والفلوس إنتي أولى بيها". دعاء ضحكت بامتنان: "بس مريم مش هتسكت يا أحمد، دي شقيانة في الفلوس دي سنتين وبتطبق بالليالي في شغل الهندسة ده.. لما تعرف إن الفلوس راحت كلها ومش هترجع، هتعمل مشكلة". أحمد لوح بإيده باستهزاء: "تعمل اللي تعمله.. أقصى ما عندها هتروح تشتكي لأمها 'بهيرة المحامية'.. وأمها دي أنا عارفها، ست لسانها طويل وبتاعة مظاهر على الفاضي، أول ما تلاقيني واخد موقف ناشف وقفلت البيت على بنتها، هتكش.. مريم مكسورة الجناح ومن غيري متسواش، وبكرة هترجع تبوس إيدي عشان أصرف عليها هي واللي في بطنها". تاني يوم الصبح، الساعة كانت تسعة. أحمد صحي من النوم في شقة أخته اللي تبات فيها، لبس هدومه ونزل وهو مقرر يروح المستشفى الحكومي اللي افترض إن مريم فيها عشان "يتكرم" ويشوف ابنه ويخلص الإجراءات. ركب عربيته الكيا سبورتاج اللي كان شاريها بقسط بيمول جزء منه من فلوس مريم، وشغل الكاسيت وعاش دور البطل المخلص. أول ما وصل قدام مستشفى الطوارئ، دور على اسم مريم في الدفاتر، الموظف بص له باستغراب: "مفيش حد بالاسم ده دخل هنا امبارح يا فندم". أحمد استغرب: "إزاي يا فندم؟ مراتي كانت بتولد وحالتها خطيرة، أكيد جت هنا في إسعاف". الموظف هز رأسه: "بقولك السيستم قدامي مفيش اسم مريم فريد تماماً". تليفون أحمد رن في جيبه، كان رقم غريب. رد بغضب: "ألو؟ مين؟" جاءه صوت راجل وقور وجاد: "أستاذ أحمد الشناوي؟ معارك المتر حازم الحديدي، من مكتب الحاجة بهيرة السلحدار.. إحنا بنخطرك إن تم رفع قضية طلاق للضرر، وقضية تبديد منقولات زوجية، وقضية سرقة للمبالغ المالية المودعة بحساب مدام مريم.. وحالياً في قوة من تنفيذ الأحكام وقسم الشرطة واقفة قدام فيلا التجمع الخامس لتنفيذ قرار الحجز التحفظي وطردك منها بناءً على إن العقار مسجل باسم المدعية". أحمد حس إن في مية ساقعة اتلقت على ظهره، صوته اتهز: "أنت بتقول إيه يا جدع أنت؟ فيلا إيه وتفتيش إيه؟ دي فيلتي وأنا اللي شاريها!" المحامي رد ببرود قاتل: "الفيلا مدفوع تمنها بالكامل من حسابات شركة التصميم الخاصة بمدام مريم، والتوكيل اللي كنت بتتعامل بيه تم إلغائه امبارح الساعة تمانية بالليل.. ياريت تشرفنا عند الفيلا عشان تستلم حاجتك الشخصية في أكياس، لأن الكوالين بتتغير دلوقتي". أحمد قفل السكة وهو مش شايف قدامه، ركب عربيتة وطار على التجمع الخامس، وهو في الطريق عمال يتصل بمريم.. التليفون مقفول. بيتصل بأمها.. الجرس بيرن ومحدش بيرد. وصل قدام الفيلا، ولقى المنظر اللي خلاه يفرمل بعنف.. عربية بوكس شرطة، واتنين أمناء شرطة واقفين، ومعاهم راجل بيغير كالون الباب الحديدي الكبير، والمحامي حازم واقف لابس بدلة شيك جداً ومعاه ملف أوراق. أحمد نزل من العربية بيجرى وزي المجنون: "أنتوا بتعملوا إيه هنا؟ دي بيتي! إزاي تدخلوا هنا؟" الضابط اللي واقف بص له بحزم: "أنت الأستاذ أحمد الشناوي؟ اتفضل أقرأ الأمر القضائي ده.. الحجز التحفظي على الفيلا وكل محتوياتها لصالح السيدة مريم فريد، وممنوع تخطي العتبة دي.. وإلا هتبقى جريمة انتهاك حرمة ملك غير، ودي فيها حبس مع الشغل". أحمد وشه بقى أزرق: "حبس؟ ومريم فين؟ مريم فين يا حرامية؟" المحامي حازم ابتسم وسحب ورقة تانية من الملف: "مدام مريم في مستشفى دار الفؤاد، في جناح خاص.. وبالمناسبة، دي صورة من البلاغ المقدم لنيابة الأموال العامة ومباحث الإنترنت.. تتبع الحساب البنكي بتاع مدام مريم أثبت إنك حولت 430 ألف جنيه لحساب موقع مراهنات مشبوه مسجل باسم أختك 'دعاء الشناوي'.. السرقة واضحة، وإثبات الضرر كامل.. وجريمة غسيل الأموال والتعامل مع مواقع مراهنات غير قانونية عقوبتها السجن المشدد.. تحب تروح للنيابة برجلك ولا تحب القوة تفضل معاك؟" في اللحظة دي، تليفون أحمد رن تاني، المرة دي كانت أخته دعاء، صوتها كان كله صريخ وعياط هستيري: "أحمد الحقني!!! الشرطة هنا في الشقة بيفتشوا، ومعاهم أمر ضبط وإحضار ليا وليك.. بيقولوا فلوس قمار ومواقع ممنوعة وأموال عامة.. أحمد أنا هتحبس! اعمل أي حاجة!" أحمد التليفون وقع من إيده على الأرض، لقى نفسه فجأة في الشارع.. معندوش شقة، معندوش حساب في البنك لأن أمي كانت جمدت الأرصدة المشتركة بموجب دعوى مستعجلة، والشرطة بتدور عليه هو وأخته. بعد مرور أسبوع.. كنت قاعدة في بيتي القديم، بيت أمي في المعادي.. البيت اللي كان دايماً دافي وجميل، والشبابيك الكبيرة بتاعته بتبص على النيل. كنت شيلة ابني "يوسف" في حضني، كان حتة سكرة، بيتنفس بهدوء وملامحه بريئة لدرجة تخليني أنسى كل الوجع اللي عيشته. أمي دخلت الأوضة وفي إيدها كباية عصير دافي، قعدت جمبي على السرير وبست يوسف من جبهته. "شايفة يا مريم؟ الراجل اللي كان فاكر نفسه ذكي ومفيش منه اتنين، قاعد دلوقتي في حجز قسم التجمع، هو وأخته المصونة"، أمي قالتها بنبرة شفقة ممزوجة بانتصار. أنا بصيت ليوسف وقولت بصوت هادي: "أنا مش شمتانة يا ماما.. بس أنا كنت ممكن أموت.. ابني ده كان ممكن ييجي الدنيا وميلاقينيش، أو يموت هو كمان في بطني لمجرد إن أحمد شايف إننا 'بنأفور' وإن أخته المتهورة أولى بلقمتنا وشقانا". أمي مسكت إيدي وقالت بقوة: "وده اللي خلاه يدفع التمن غالي.. محامي موقع المراهنات اعترف بكل حاجة عشان ينجي بنفسه، وأثبت إن دعاء كانت بتلعب بقالها سنة وضيعت ملايين، وأحمد كان بيغطي عليها من وراكي وبياخد من فلوس شركتك.. القضية دلوقتي بقت جناية سرقة، خيانة أمانة، وتسهيل أعمال مراهنات غير مشروعة.. أحمد هيتحكم عليه بأسبوع مش أقل من 5 سنين سجن، وأخته هتاخد نفس العقوبة.. ده غير إننا رفعنا قضية نفقة متعة ونفقة صبي، وهيتحجز على عربيته اللي لسه مدفعش باقي أقساطها عشان نسدد منها ديونك". دمعة نزلت من عيني، بس المرة دي كانت دمعة راحة.. الخوف اللي عيشته لسنوات، الإحساس بإني دايماً مقصرة ومضطرة أستحمل الإهانة والتقليل من شأني عشان المركب تسير، كل ده اتمسح في لحظة.. ربنا جابلي حقي تالت ومتلت ومن أوسع الأبواب. "شكراً يا ماما.. من غيرك كنت هبقى ضحية جديدة في دفاتر الطوارئ"، قولت لها وأنا بحضنها. أمي ضمتني ليها وقالت: "أنا اللي أسفة إني سبتك تصدقي كلامه زمان.. بس المهم إنك فوقتي.. وبكرة أحسن بكتير". مرت تلات شهور.. الحياة بدأت ترجع لمجراها الطبيعي.. رجعت لشغلي في المكتب الهندسي بتاعي، وبقى عندي عملاء أكبر، واسمي بقى معروف في السوق بشكل مستقل.. يوسف كبر شوية وبقت ضحكته بتملى عليا البيت.. أحمد وأخته صدر ضدهم حكم مبدئي بالسجن 7 سنوات مع الشغل والنفاذ، وكل محاولات أهله عشان أتنازل باءت بالفشل.. كنت بقفل الباب تماماً في وش أي حد يخصه. في يوم، كنت برتب أوراق قديمة في مكتب الشغل بتاعي، ولقيت نوتة صغيرة أحمد كان كاتبها ليا في أول سنة جواز.. كان كاتب فيها: "إنتي أماني الوحيد يا مريم، ومن غيرك أنا أضيع".. ضحكت بسخرية ورميت النوتة في الباسكت.. الأمان مش كلام، الأمان أفعال، والراجل اللي يبيع مراته وهي بتموت عشان يشتري رضا أخته المدمنة على القمار، ملوش مكان حتى في الزبالة. تليفوني رن.. كان المحامي حازم الحديدي. "ألو.. أيوة يا متر.. في جديد في القضية؟" سألته وأنا براجع تصميم جديد على اللابتوب. صوت المحامي كان متغير، مش النبرة المنتصرة بتاعة كل مرة، كان فيه نبرة قلق وغموض غريب: "مدام مريم.. في حاجة حصلت في السجن النهاردة الصبح ولازم تعرفيها فوراً.. أحمد متبهدلش بس في الحجز.. أحمد اتعرض لحادثة جوة". قلبي انقبض فجأة، مش خوف عليه، بس صدمة: "حادثة إيه يا متر؟" المحامي أخد نفس طويل وقال: "الناس بتوع مكتب المراهنات اللي دعاء كانت مديونة لهم.. اتضح إن الـ 430 ألف جنيه اللي أحمد حولهم مكنوش كل المديونية، ده كان جزء صغير جداً من مبلغ يوصل لـ 5 مليون جنيه.. الناس دول ليهم رجالة جوة السجن، والنهاردة الصبح وصلوا لأحمد في طابور التمام.. أحمد اتنقل المستشفى في حالة حرجة جداً بين الحياة والموت بعد ما اعتدوا عليه بآلات حادة.. بس المشكلة مش هنا يا مدام مريم". وقفت من على الكرسي وجسمي كله سقع: "أمال المشكلة فين؟" المحامي حازم قال بصوت واطي جداً وكأنه خايف حد يسمعه: "قبل ما أحمد يدخل في الغيبوبة، اعترف للنيابة اللي راحت تحقق في المستشفى.. وقال إن كل التصاميم الهندسية والـ 'رندرات' اللي إنتي كنتي بتعمليها لشركات المقاولات الكبيرة السنة اللي فاتت.. هو كان بياخد نسخ منها ويبيعها لشركات منافسة لحساب نفس شبكة المراهنات دي عشان يسدد ديون أخته القديمة.. والشركات دي دلوقتي رفعت قضية تجسس صناعي وسرقة أسرار تجارية بمليارات الجنيهات.. والنيابة دلوقتي مطلعة أمر باستدعائك إنتي شخصياً كمتهمة أولى لأن العقود والتصاميم طالعة من جهازك وبإمضاءك الإلكتروني.. البوليس في طريقه لمكتبك دلوقتي يا فندم.. لازم تتحركي حالاً". وقفت مكانى مذهولة.. اللابتوب قدامي، وصوت سارينة عربية الشرطة بدأ يظهر بوضوح من الشارع تحت مكتبي.. أحمد مكنش بس بيستغلني.. أحمد سابلي لغم هيفجر حياتي كلها دلوقتي..