بره البيت

طلبت منه يلم بقية كراكيبه ويغور من الشقة. رفض وقال: “دي بيتي ومش طالع منها!”.. بس المحامية طلعت عقد الشقة وشهد الملكية، الشقة باسمي رسمياً لأن بابا هو اللي دفع المقدم وكتبها باسمي قبل الجواز.

طنط ماجدة مسكت ابنها من دراعه بقلة حيلة:

— قوم معايا.. يلا على البيت.

— يا أمي دافعي عني! قولي حاجة!

— الأم ما بتسترش على الخيانة والنذالة يا حازم.

وهو بيلم بقية هدومه في شنطة زبالة، جاله مسج من نيرمين:

“لو ندى طالبت بفلوس الشقة أو الفلوس اللي اتصرفت، أنت اللي هتشيل الشيلة لوحدك.. أنا مش هضيع مستقبلي وشغلي بسبب قذارتك.”

ساعتها بس فهم إن الست اللي ضحى ببيته وابنه عشانها، كانت أول واحدة تتخلي عنه وترميه في الزبالة.

قبل ما يخرج من الباب، قرب مني وقال بحقد:

— من غيري مش هتعرفي تربي الولد ولا تعيشي.

بصيت له بثبات وقولتله:

— أنا بقالي سنة بربي وبشيل المسئولية لوحدي.. من النهاردة الفرق الوحيد إني ارتحت من عيل زيادة كنت بشيل همّه.

خرج حازم من الشقة وهو بيسحب شنطته، والباب اترزع وراه. أول ما أتقفل، حسيت برجلِيّ مش شايلاني. قعدت على أقرب كرسي ودموعي نزلت، مش زعل عليه، لكن تفريغ لكبت وتعب سنة كاملة من القهر والإهانة، والتمثيل إني عايشة في بيت طبيعي.

أمي أخدتني في حضنها، وبابا وقف يسلم على المحامية ويتفق معاها على الخطوة الجاية.

— من بكرة صباح ربنا يا أستاذة، ترفعي قضايا الطلاق للضرر، والتمكين، ونفقة الولد.. ومش عايزين منه ولا مليم زيادة عن حق حمزة القانوني.

في خلال أسبوعين، كانت المحامية تحركت في كل الاتجاهات. القوايم والتسجيلات وعقد الشقة المفروشة وكشوف الحسابات البنكية كانت كفيلة تخلي ق\ضية الطلاق للضرر تتحسم بسرعة الصاروخ، وقاضي الأسرة حكم لي بالطلاق وبنفقة محترمة لحمزة، وبحق حضانتي الكاملة.

حازم حاول في الأول يلعب كارت “أنا الأب” ويساومني على الرؤية، بس أول ما أتعرضت عليه القضايا والتسجيلات في النيابة، محاميه نصحه يلم دورة ويتنازل عن أي عنتريات لأن كروت الق\ضية كانت كلها ضد صالحُه.

بس المشاكل ما وقفتش عنده هو وبس.

نيرمين اتفاجأت إن فضيحة الشركة انتشرت زي النار في الهشيم. بابا كان بلّغ إدارة HR في الشركة باللي حصل وبالمستندات اللي بتثبت استغلال حازم ونيرمين لمأموريات العمل وسفريات الشركة في أغراض شخصية وتزوير الفواتير. الشركة عملت تحقيق داخلي انتهى بـ فصل حازم ونيرمين فصل تعسفي وبدواعي إخلال بالأمانة والشرف، وطردوا الاثنين في نفس اليوم.