سماره
ــ انت شكلك اتجننتي وجايه تطلعي جنانك ده عليا علشان تبوظي لي يوم خطوبتي نعمان بيه مين اللي هيبص لك يا جربوعه انت اطلعي بره من هنا يا شوارعيه .
بصيت لهم سماره بضحكه استفزاز ومن جواها بيغلي من كلامهم :
ــ طب ماشي يا نعمان بيه انت والست فرحه هانم ان ما خليت النهارده امك يجرا لها حاجه بسبب اللي هقوله واللي هعلنه قدامهم كلهم ما ابقاش انا سماره .
اتكلم نعمان علشان يتقي شرها وهو بيهمس لها في ودانها علشان فرحه ما تسمعهوش وهو عارف من جواه مدى وشها المكشوف وجراءتها وانها بايعه الدنيا باللي فيها وخصوصا بعد ما عرف ان ابوها عملوا فيها بالصدفه منها من بعيد لبعيد :
ــ لم تعابينك يا سماره وما تبوظيش الليله وما تعمليليش فضايح انا ما استاهلش منك كده وبعد كده نتفاهم
ضحكت سماره بمياعه :
ــ وانت مفكرني هبله علشان اضيع الفرصه دي من ايدي يا نعمنتي النهارده بدل ما هتبقى خطوبتك بس يبقى دخلتنا احنا الاثنين قدام الدنيا كلها وعمري ما هلاقي فرصه زي دي علشان اكلبشك بايدي وده حقي .
ــ حق مين يا جربوعه اللي جايه تهدديني بيه ده انا بطلقه واحده اخلص منك واشيعك لعزرائيل وارتاح من قرفك لمي الدور يا سماره بدل ما يبقى موتك النهارده .
سابته سماره وهو واقف يغلي ومصممه على اللي في دماغها وانها مش هتضيع الفرصه دي من ايدها وفضلت تتمشى برقصتها لحد ما وصلت لبتاع الدي جي واخدت منه المايك واجبرت الكل اني واسمعها والجميع انصدم من كلامها :
ــ انا النهارده جايه ارقص في فرح جوزي نعمان بيه اللي خبى عن الدنيا كلها انه متجوزني علشان مستعر مني اكمني ولا لي اب ولا ليا ام فقلت اجي اوجب معاه النهارده بقى يرضيكم يا بتوع الكومباوندات والهالللو والميرسي ان جوزي يستعر مني وما يرضاش يقول لامه انه متجوز ومراته حامل كمان .
اول ما ام نعمان سمعت كلام السماره وبقت تبص لها علشان تعرف هي مين عمرها ما شافتها قبل كده وجريت عليها وهي بتشدها من دراعها وبرده بتستنكر كلامها :
ــ انت بتقولي ايه يا بت انت مين اللي مسلطك علينا بالظبط عشان تيجي تبوظي خطوبه ابني انا ابني مش متجوز حد واذا كنت جايه ترمي بلاكي عليه انا هوديكي ورا الشمس .
ـــ اه اشهدوا يا ناس على كلام حماتي وهي عايزه تموتني وتحبسني ظلم علشان ابنها ما قالهاش ان هو متجوز ولا عرفها على سماره ، خليكم كلكم شاهدين وكمان طلعوا موبايلاتكم وصوروا كل لحظه بتحصل علشان الدنيا كلها تشوف جوزي وهو بيتجوز عليا .
