سماره
ــ والله يا ست هانم غصب عني لقمه العيش هي اللي حوجتني اني اعمل كده بس انا عايزه افهمك على حاجه ان سماره دي مش بنتي دي بنت مراتي وانا كسبت فيها ثواب وقلت اربيها .
سماره كان خنجر اترشق في قلبها من كلام محروس اللي انكر ابوتها بكل دم بارد وكانه ما يعرفش عنها اي حاجه وبصيت له بخذلان وهي بتقول له :
ــ شكرا يابا شكرا يا عم محروس انك متبري مني قدام الست هانم وطالما اتبريت مني يبقى ما لكش دعوه بيا تاني ،
وبصت على ام نعمان تاني وهي بتاكد لها بقوه معناها انها مش هتسيب حقها:
ــ اما انت بقى يا حماتي العزيزه هروح للقسم وهتهم ابنك انه استغل براءتي وطفولتي وضحك عليا واتجوزني في السر وان ما كنتش امرمطه ورايا في المحاكم ما بقاش أنا سماره وهوريكم الجربوعه هتعمل فيكم ايه .
لحد هنا وفرحه ما قدرتش تتحمل وكل ده بيحصل قدامها في يوم خطوبتها وامها واقفه جنبها حضنها وفي ثانيه قلعت الدبله اللي لسه لابساها يا دوب ورميتها في وش نعمان وفجاه نزلت على وشه بقلم خلت الكل واقف مصدوم ومذهول من اللي بيحصل ككل :
ــ انت طلعت كذاب واناني بقى انت تضحك عليا وانت متجوز في السر ورسمت لي البحر طحينه انت وامك الحمد لله ان ربنا كشفكم قبل ما نتجوز مش عايزه اشوف وشك تاني .
ام نعمان حاولت توقفها هي واهلها وتهدي الموقف :
ــ بلاش تسمعي كلام البنت خرابة البيوت دي انا هوديها في داهيه وهطلب لها الامن وهوديها وراء الشمس اقعدي يا بنتي ما تضيعيش فرحتك وانا لسه هاكد لك ان البنت دي كذابه .
ضحكت سماره باستهزاء وهي بتقرب من فرحه وجواها حالف يا تاخد حقها ثالث ومثلث من نعمان ومحروس ودلوقتي دخلت امه في قائمه الانتقام لانها كانت السبب ان محروس لبسها جلابيه الولد وما رافتش بيهم لما اشترطت عليه ما تكونش بنت :
ــ خليها تمشي يا حماتي احسن لما تتاكد بجد ان ابنك متجوزني وماضي وخاتم كمان ولا انت عاجبك الفضايح والناس عماله تتفرج علينا .
ام نعمان وهي بتبرق لها بصدمه من كلامها:
ــ انت تخرسي خالص مش عايزه اسمع صوتك اطلعي بره ومش عايزاك تدخلي البيت ده تاني .
ضحكت سماره بوجع لكن قوت احالها وبصت على المعازيم اللي واقفين وهي بتقول لهم :
ــ بصوا لي يا جماعه وصوروا كل حاجه بتحصل علشان انا عارفه ان الست دي وابنها مش هيسيبوني في حالي وهيموتوني لازم قصتي الناس كلها تشوفها وتعرفها علشان ما حدش فيهم يقدر يلمسني ،
