رسالة منى
«دخلت يا حسن؟ عرفت قيمتك وقيمة أهلك؟» قالتها وهي بتوسع لي السكة بـ قرف.
دخلت الصالة. السفرة كانت فاضية المرة دي، بس كان قاعد عليها أبويا الحاج حامد، وأختي منى، والبرنس طارق اللي كان لابس بدلة وكإنه وزير العدل وقاعد حاطط رجل على رجل وبيدخن سيجارته بـ علو شأن.
«أهو جيه يا سيدي.. جيه ورجله فوق رقبته»، منى قالتها وهي بتضحك بـ شماتة وبتشاور عليا.
حطيت صينية البسبوسة على السفرة وقعدت على كرسي بـ هدوء. حطيت إيدي في جيبي وشغلت جهاز التسجيل الصغير اللي أشرف مأمنهولي.
«أنا جيت اهو يا جماعة»، قلت بصوت هادي ومكسور “تمثيلاً”، «عشان ننهي الموضوع ده. أنا مش حمل محاكم وحبس، وعيالي ملهمش ذنب يتشردوا».
أبويا الحاج حامد ضرب بقبضته على التربيزة: «أنت اللي قليل الأدب وناكر للجميل يا حسن! بقيت تستخسر فينا الفلوس؟ بقيت عايز تقطع عننا المصروف عشان مراتك والعيال؟ البيت ده بيتنا، والشقة دي شقتنا، وأنت لولا خيرنا مكنتش هتبقى بني آدم وتفتح شركة!».
«يا حاج حامد»، طارق اتدخل بـ صوته الرخيم، «خلاص، الأستاذ حسن عرف غلطه وجاي يصلح اللي أفسده. أستاذ حسن.. الورق جاهز اهو. التنازل عن نصيبك في الشقة لـ أختك منى، وإقرار بـ سداد مديونية الشيكات الـ ٢ مليون جنيه اللي مع منى، وبـ الإضافة لـ تفويض بنكي بـ خصم ٣٠ ألف جنيه شهرياً لوالدك ووالدتك كـ نفقة عائلية مدى الحياة. تمضي من هنا.. الحجز يترفع بكرة الصبح، والشيكات تتقطع قدام عينك».
بصيت لـ طارق، وبعدين بصت لـ منى: «يعني الشيكات دي يا منى، أنتي عارفة إن مفيش بيني وبينك أي شغل بـ ٢ مليون جنيه؟ أنتي عارفا إن دي شيكات أنا ممضيتهاش أصلاً وأنتي وطارق اللي زورتوها عشان تلووا دراعي وتجبروني أمضي على التنازل؟».
منى اتعصبت وقالت بـ غباء ملوش مثيل: «اه زورتها يا حسن! ومحدش هيقدر يثبت حاجة! طارق مظبط كل حاجة في البنك وفي الشهر العقاري، والتوكيل اللي عملناهولك بـ اسم أبوك يودي في داهية! إحنا اللي عملنا التوكيل وإحنا اللي مضينا الشيكات، وبـ القانون هناخدهم منك.. لو متمضيتش على الورق ده دلوقتي، مش هتشوف الشمس تاني!».
أمي ضحكت وقالت: «امضي يا واد وخلصنا، بدل ما تترمي في السجن ومراتها تتبهدل والعيال تضيع.. إحنا اللي عملنا التوكيل عشان نضمن حقنا فيك، أنت ملكنا وفلوسك ملكنا!».
