مرام بنت عاديه

البوست وصل لكل حتة وكل جروبات القاهرة بتتكلم عنه بنت المترو وصاحب النظرة بقى حديث المدينة ومرام بقت مشهورة فجأة لدرجة ان صحابها في الشغل بيقولوا لها يا بتاعة المترو

في نفس الوقت كان في شاب اسمه فؤاد قاعد في بيته بيقلب في فيسبوك لقى البوست قدامه قراه واتصدم لانه هو صاحب النظرة هو اللي شافها في المترو وعينيه جت في عينيها عشر ثواني ومش قادر ينساها من ساعتها

فؤاد ده كان شاب كويس جدا مهندس وشغال في شركة كبيرة ومحترم وكل حاجة بس المشكلة الكبيرة انه كان مرتبط وخاطب بنت اسمها مليكة ومليكة دي تبقى صاحبة مرام ومسك من نفس الشلة بتاعة الجامعة

فؤاد اول ما شاف البوست قلبه وقع في رجليه قال يا نهار اسود دي مرام صاحبة مليكة خطيبتي ازاي ده حصل فضل يفكر يعمل ايه يقول لمليكة ولا يسكت ولا يكلم مرام ولا يعمل ايه

هو من جواه كان حاسس بحاجة غريبة ناحية مرام من اول نظرة بس كان بيحاول يقنع نفسه ان ده وهم وانه بيحب مليكة وهيحبها وهيتجوزها خلاص فاضل شهرين على الفرح وكل حاجة محجوزة

مليكة شافت البوست هي كمان ومسك بعتته لها وقالت لها شوفي مرام المجنونة عملت ايه مليكة ضحكت في الاول وقالت يا مجنونة مرام دي بتدور على حب في المترو بس لما دققت في الوصف حست ان الوصف ده شبه فؤاد خطيبها بالظبط القميص الابيض والشنطة السودة والطول والعين العسلي

قلبها اتقبض وراحت سألت فؤاد انت كنت في مترو الشهداء امبارح الساعة تمانية فؤاد اتلجلج وقال لها اه كنت رايح مشوار شغل في وسط البلد والمترو كان اسرع حاجة مليكة سكتت بس الشك بدأ يلعب في دماغها

مرام من ناحيتها كانت كل يوم بتدخل تشوف البوست وهل حد وصله ولا لا وكانت كل شوية يجيلها رسايل من ناس بتقول انا صاحب النظرة وناس بتهزر بس مفيش حد هو بجد كانت بدأت تيأس

لحد ما في يوم لقيت رسالة من اكونت اسمه فؤاد بيقول لها انا اللي شفتك في المترو وانا صاحب النظرة اللي بتدوري عليه مرام قلبها دق جامد وفتحت الرسالة بسرعة وقالت له بجد انت هو

فؤاد قال لها اه انا هو وانا مش قادر انسى نظرتك من ساعتها بس في مشكلة كبيرة لازم تعرفيها مرام قالت له مشكلة ايه قال لها انا خاطب ومليكة خطيبتي وانتم صحاب

مرام اتصدمت صدمة عمرها الدنيا لفت بيها ازاي يعني حب عمرها اللي بتدور عليه يطلع خطيب صاحبتها ازاي القدر بيلعب اللعبة دي بيها قفلت الشات وقعدت تعيط طول الليل