محمود
أول ما محمود شافني واقفة ساكتة ومش بتحرك من مكاني قرب مني بسرعة وقال بصوت واطي
إنتي مالك واقفة كده ليه
بصيت له من غير ما أرد
هو كان بيحاول يمثل إنه متوتر على أمه بس أنا بقيت شايفة كل حركة منه
سامح كان ماسك أمه وبيقول
ماما ردي عليا حاسة بإيه
الحاجة نوال كانت عرقانة ووشها اصفر وبتتنفس بصعوبة
الحاج عبدالعزيز جري جاب مية
ومنى كانت بتقول اتصلوا بالإسعاف بسرعة
أما محمود ففضل واقف مكاني
قرب مني أكتر وهمس
إنتي غيرتي الطبق؟
قلبي وقف للحظة
لأول مرة هو بنفسه قالها
ما احتجتش أسأله هو يقصد إيه
كنت عارفة
بصيت له وقلت بهدوء
طبق إيه؟
وشه اتغير
حاول يضحك ويقول
ولا حاجة أنا بس بسألك
في اللحظة دي وصلت الإسعاف ونقلوا الحاجة نوال للمستشفى
وأنا ركبت معاهم
مش عشان كنت خايفة عليها بس
كان لازم أعرف إيه اللي كان موجود في الطبق
طول الطريق محمود كان ساكت
بس كل شوية يبص لي من المراية
وأنا كنت عاملة نفسي مش واخدة بالي
وصلنا المستشفى والدكاترة دخلوا أمه بسرعة
بعد حوالي ساعة خرج الدكتور وسأل
مين من أهلها؟
الحاج عبدالعزيز قرب منه
الدكتور قال
هي مستقرة دلوقتي لكن لازم نعرف كانت أكلت إيه قبل ما تتعب بالظبط
محمود رد بسرعة
أكلت شوربة فراخ عادية
بصيت له
وقلت
زي اللي كنت هآكلها أنا
لف ناحيتي بسرعة
الدكتور سألني
يعني إيه؟
قلت له
قبل ما ناكل شفت محمود وهو بيحط حاجة في طبق الشوربة بتاعي
سكت المكان كله
محمود اتصدم
إنتي بتقولي إيه؟
قلت
اللي شفته بعيني
قرب مني وقال بعصبية
إنتي تعبانة بقالك شهور ومش عارفة بتقولي إيه
الجملة دي كانت كفاية
نفس الجملة اللي كان بيكررها كل مرة
إنتي بتتخيلي
بس المرة دي ما كنتش لوحدي
الدكتور كان واقف بيسمع
والحاج عبدالعزيز كان باصص لمحمود بصدمة
قلت للدكتور
أنا غيرت الطبقين قبل ما ناكل
الدكتور فهم فورًا
قال
يبقى لازم نعرف محتوى الأكل اللي أكلته والدتك
