لينا قاعده
في اليوم الرابع خرجوا يتمشوا على النيل بالليل، الجو كان حلو والهوا بيطير شعرها، آدم فجأة مسك ايدها وقالها لينا انا عارف ان ده تمثيل في الأول بس انا حاسس بحاجة غريبة، انا حاسس اني مش بمثل، انا بجد مبسوط وانا معاكي، لينا اتخضت وسحبت ايدها بسرعة وقالت له انت اتجننت، احنا متفقين على شغل، متلخبطش الأمور، هو سكت ووشه احمر وقالها آسف، بس عنيه كانت بتقول كلام تاني خالص.
لينا روحت يومها مش عارفة تنام، كلام آدم بيرن في ودنها، هي كمان بقت تحبه، بتحب طيبته وجدعنته وازاي بيخليها تضحك من قلبها، بس خافت، خافت لو قالت له انها بتحبه يفتكرها بتمثل، وخافت اكتر من سلمى ومن الرهان، فضلت تقول لنفسها ده فقير وبياخد فلوس عشان يمثل انه بيحبني، فوقي يا لينا.
وفي يوم من الايام اللي بعدها لينا طلبت من آدم يجي معاها فرح بنت خالتها جني، وجني دي كانت بنت لذيذة وبتحب لينا قوي، وآدم وافق وراح معاها وكان شكله زي القمر، كل الناس في الفرح كانوا بيبصوا عليهم ويقولوا ايه الجمال ده، حتى جني نفسها قالت للينا يا بختك يا لينا، الواد ده بيحبك بجنون باين من عنيه، لينا ضحكت بس من جواها كانت طايرة، آدم طول الفرح كان ماسك ايدها ومش سايبها لحظة، ويرقص معاها ويضحكها، ولما روحوا قالها انا عمري ما اتبسطت كده، انا حاسس اني معاكي بنسى اني فقير وبنسى كل همومي، انتي بتخليني احس اني غني بيكي.
لينا بدأت تحس انها بتتعلق بيه اكتر من اللازم، بقت تفكر فيه طول الوقت، حتى في الشغل بتسرح وتفتكر كلامه، وياسين صاحب المكتب كان كل شوية يكلمها يقولها خلي بالك آدم طيب قوي وبيتأثر بسرعة، متعلقهوش بيكي لو انتي مش ناوية تكملي، لينا كانت بتقول له متقلقش كله تمثيل، بس هي عارفة انها بتكدب على نفسها قبل ما تكدب عليه.
اليوم السادس كان يوم الحسم، سلمى عزمتهم على عشاء في مطعم غالي جدا في التجمع، وجابت معاها خطيبها سيف عشان تغيظهم، طول العشاء سيف كان بيبص للينا بطريقة مش مريحة وبيسأل آدم انت شغال ايه يا آدم، آدم اتلجلج وقال انا شغال في بيزنس خاص، سيف ضحك وقال بيزنس ايه يعني، ما تقول، آدم سكت، لينا حاولت تغير الموضوع بس سيف كان مصر، قام مطلع تليفونه ووراهم صورة لآدم وهو لابس لبس عمال في مسرح وبيكنس الخشبة، وقال انا شفت الواد ده قبل كده، ده كومبارس في مسرح شعبي وبياخد خمسين جنيه في اليوم، انتي مأجرة حبيب يا لينا، مش كده.
