شريف خرج من المستشفى
شريف خرج من المستشفى وهو حاسس إنه ملك زمانه، راكب عربيته المرسيدس اللي رانيا هي اللي دفعالها المقدم، وجنبه سهام بتتدلع ببطنها المنفوخة، وفي الكنبة اللي ورا فوزية عمالة تزغرد وتدعي لسهام اللي “بيضت وشهم” وجابت للبيت وريث، وشريف عمال ينفخ صدره ويقولها خلاص يا أمي، الغمة وانزاحت، رانيا وبناتها بقوا من الماضي، دلوقتي نركز في الفرح الكبير اللي هيليق بوريث عائلة شريف السيوفي، وفي الناحية التانية، في شقة شبرا القديمة، رانيا كانت قاعدة في بلكونتها بتبص على شوارع القطب المحفورة بالذكريات، دموعها نشفت تماماً، وحل مكانها برود زي التلج، كريم أخوها دخل عليها بكوبايتين شاي بقرنفل، قعد قدامها وحط اللاب توب على رجله وقالها بصوت واطي ومغلف بالغل: رانيا، شريف مقدم في إنذار الطلاق طلب بتمكين شقة مصر الجديدة، وعاوز ياخد الفيلا بتاعة الساحل، وفاكر إن العقود اللي معاه تخليه يطردك في الشارع، رانيا أخدت بؤ من الشاي، وبصت لكريم وابتسمت ابتسامة خلت جسم كريم نفسه يقشعر، وقالتله: شريف عايش في الوهم يا كريم، شريف طول عمره بيمضي على أي حاجة من غير ما يقرا، كان بياخد العقود مني وهو رايح يتمنظر بيها قدام الموردين، فاكر لما قالي اعمليلي توكيل عام عشان أدير بيه شركة المقاولات؟ أنا عملتله توكيل إدارة بس، مش بيع ولا شراء، والأهم من ده كله، الأرض اللي قايم عليها المشروع الجديد، الكومباوند اللي حاطط فيه كل قرش سلف واستلفه من طوب الأرض، الأرض دي ملك مين يا كريم؟ كريم ضحك بصوت عالي: ملك بابا الله يرحمه، يعني بتاعتك أنتِ وأنا، وهو شاريها بعقد ابتدائي ملوش أي لادمة من غير إمضتك كشريكة بالنص، رانيا هزت راسها وطلعت الموبايل وبصت على الإيميل بتاع مركز الخصوبة اللي بيقول إن شريف عمل عملية “عقم دائم” من سنة ونصف، وقالت: شريف بيجهز لفرحه على سهام بعد شهرين، في أكبر قاعة في التجمع، وعازم كل رجال الأعمال والمستثمرين اللي في السوق عشان يثبت رجليه، وكمان عشان يشهر جوازه ويغيظني، أنا مش هرفع قضايا دلوقتي يا كريم، أنا هسيبه يصرف كل مليم حيلته على الفرح ده، هسيبه يستلف عشان يرضي غرور أمه وفشخرة السكرتيرة بتاعته، وعايزاك تجهزلي ملف كامل فيه كل الورق ده، مش هسيب الورق ده يشوف النور إلا في وسط المعازيم، وتحت الكوشة بتاعته.
