وقف العرق
جريت جنى برة القاعة وهي بتعيط، وأصحابها جريوا وراها عشان يوصلوها.
القاعة فضيت في أقل من عشر دقايق. حتى والد شيماء وباقي أهلها، قفلوا تليفوناتهم ومشيوا من الكسفة بعد ما الجرص والتريقة بقت على كل جروبات عيلتهم!
شيماء وإسلام قعدوا لوحدهم في القاعة الفخمة الكبيرة… الويترز والعمال بتوع المطعم كانوا بيبصولهم بنظرات كره وقرف، حتى المدير جاب الحساب وحطه قدام إسلام بقسوة وقال له: “اتفضل الحساب يا أستاذ.. ويا ريت تخلصنا عشان القاعة هتقفل.”
الحساب كان 45 ألف جنيه!
إسلام طلعت الفيزا بتاعته… الفيزا رفضت العملية لأن المبلغ مش متغطي!
اتلفت لشيماء وهو مرعوب: “ادفعي من معاكي يا شيماء!”
شيماء بصت له بجليد: “أنا معاييش المبالغ دي كاش! اتصرف أنت!”
هنا… الشيطنة والضغط انفجروا بين إسلام وشيماء.
إسلام صرخ في وشها في نص المطعم: “أنتِ اللي ورطتيني! أنتِ اللي عملتي الفكرة دي! أمي إيدها اتحرقت يا زبالة وأنا مشيت ورا كلامك الفارغ! فضحتيني وفضحتِ نفسك وفضحتِ اسمي قدام مصر كلها!”
شيماء ردت عليه بقلة أدب: “أنت اللي راجل خفيفة وما عندكش كلمة! محدش ضربك على إيدك عشان تجيلي!”
الخناقة كبرت، والشتائم اتطورت لدرجة إن أمن المطعم تدخل وطزهم برة بعد ما إسلام اضطر يرهن ساعته وتليفونه عشان يغطي جزء من الحساب ويسيب بطاقته!
رجعت أنا ونوال شقتنا الساعة واحدة بالليل.
الشارع كان فضي خلاص، بس الضحكات والدعوات كانت لسة رادت في الحارة. الأكل كله خلص، والناس سابوا لنوال المبالغ اللي دفعوها محبة، جمعنا أكتر من 20 ألف جنيه في أقل من ساعتين! أضعاف اللي صرفناه، والفرن الجديد الصاج بتاع المحل نزلنا اشتريناه محجوز للصبح!
نوال كانت قاعدة على الكنبة، مش مصدقة اللي حصل. فرحانة بحب الناس، بس في غصة في قلبها… غصة الأم اللي ابنها بايعها.
وفجأة… التليفون رن.
كان رقم إسلام.
بصيت لنوال. نوال غمضت عينها وهزت رأسها بـ “لا”.
قفلت السكة في وشه.
رن تاني… وتالت… ورابع.
وبعدين بعت رسائل صوتية ورسائل مكتوبة ورا بعض زي المطر:
“بابا! رد عليا أرجوك! الناس بتموتني على النت! شغلي في الشركة اتهدد! المدير طلبني للتحقيق بكرة بسبب الهاشتاج والفضايح! يابابا امسح المنشور أرجوك! شيماء سابت البيت ومشت عند أهلها وأنا اتخانقت معاها! رد عليا يا بابا أموت نفسي يعني؟!”
