الموظفه2

وشغاله موظفه حكايات رومانى مكرم 2 قفلت السكة في وشه، وبصيت للموبايل في إيدي وأنا حاسة برعشة انتصار معجونة بوجع قديم. لأول مرة من سنين أحس إن ضهري مش مكشوف، وإن القانون والذكاء يقدروا يرجّعوا الحق اللي اتسلب بالغصب والابتزاز النفسي. محمود كان فاكر إن سكوتي وطيبتي هبل، وما كانش يستوعب إن الست لما تتجرح في كرامتها ودمها يتحرق، بترتحل من منطقة الضعف لمنطقة القوة المطلقة. بعد السكتة دي بساعتين، تليفوني مأبطلش رن. مش من محمود بس، ده من أخته وأمه وحتى أصحابه اللي عمرهم ما افتكروني بكلمة طيبة. الكل بيترجى وبيحاول يلطّف الجو. أخته اتصلت وهي بتبكي وتدّعي المظلومية: "يا أمل يا حبيبتي، ده مهما كان جوزك وأبو عيالك المستقبلي، هتهدّي بيتك عشان قرشين؟ محمود غلطان وإحنا بنقرّ بصلته، بس بلاش توصل للنيابة والمحاكم وتفضحينا قدام الناس! "رديت عليها بصوت أبرد من الثلج: "لما كان بياخد فلوسي بالتهديد والنكد ويشتري بيها شقة يتجوز عليا فيها، ما افتكرش البيت ولا الفضيحة. الفلوس دي رزق بابا الله يرحمه، ومفيش مخلوق هيشاركني فيه بالقوة." وقفت السكة في وشها هي كمان وعملت حظر لكل أرقام عيلته. تاني يوم الصبح، نزلت مع الأستاذ رفعت المحامي على مقر النيابة العامة. الجو هناك كان يوتر، بس وجود المحامي معايا وثباتي خلوني واقفة على أرض صلبة. محمود كان قاعد في الطابور برة مكتب وكيل النيابة، وشه أصفر وشعره منكوش، وهدومه مش مترتبة زي العادة. أول ما شافني طالع السلم، اتنطر من مكانه وجيه يجري عليا، بس محاميّ وقف في وشه ومنعه يقرب. محمود بصلي بعيون مليانة توسل وخوف، وقال بصوت واطي ومبحوح: "أمل... عشان خاطري استمري معايا في الكلام دقيقة واحدة. أنا مستعد أكتبلك الشقة كلها باسمك، وأطلق الست تانية دي النهاردة قبل بكرة، بس اسحبي البلاغ ده.. أنا موظف وممكن أترفد من شغلي لو التحقيق ده كمل!"بصيتله من فوق لتحت وقلتله: "أنت كتبت الشقة باسمك بفلوسي، والنهاردة الشقة دي مش هتكفيني. . أنا هآخد حقي كامل بالقانون، والخلع شغال، والشرف اللي ضيعته بتمثيلك مش هيرجع غير لما تشوف عقابك."دخلنا لمكتب وكيل النيابة. التحقيق كان دقيق جداً. الأستاذ رفعت قدم مذكرة معروضة بذكاء شديد: كشف حساب بنكي بيثبت سحب المبلغ (مليون و300 ألف جنيه) كاش في يوم محدد وساعة محددة، وفي نفس اليوم ونفس الساعة تقريباً، عقد شراء الشقة التجاري/السكني اللي محمود اشتراها باسمه وتم سداد قيمته كاش بنفس الرقم. ده غير شهادة السمسار اللي اعترف في التحقيقات الأولية إن محمود هو اللي سلم المبلغ كاش، بالإضافة لتسجيلات الفيديو والصور اللي أثبتت وجوده في الشقة مع زوجته الثانية والعفش الجديد اللي اشتروه. وكيل النيابة وجه لمحمود اتهامات صريحة بالنصب وخيانة الأمانة والاستيلاء على أموال عن طريق الإكراه النفسي والتدليس. محمود قعد يتلجلج ويقول: "دي مراتي والفلوس دي كانت مشاركة بيننا بعلمها ورضاها عشان نستثمرها!"هنا المحامي بتاعي رد بثبات: "لو كانت بموافقتها ورضاها، ليه الموكلة طلبت كتابة نصيبها باسمها والمشكو في حقه رفض وزعق وهددها بالإيذاء النفسي؟ وليه تم الشراء باسمه فقط ودون علمها بالزواج الثاني؟ "النيابة قررت حبس محمود 4 أيام على ذمة التحقيق لحين استكمال التحريات ومواجهته بالشهود. لحظة ما الكلبشات اتكلبشت في إيده، محمود بصلي بنظرة رعب وعجز عمري ما هنساه. كان بيترجى ببنظرته إن أقول كلمة واحدة تطلعه، بس أنا درت وشي ومشيت. المعركة ما انتهتش هنا. الزوجة الثانية لما عرفت إن محمود اتحبس وإن الشقة والعفش والذهب معرضين للحجز والتحفظ القضائي لأنهم ممتلكات جاية من جريمة نصب، اتجننت! راحت للنيابة عملت محضر ضد محمود تتهمه فيه إنه خدعها وقدم لها ذهب وفلوس مش ملكه وضحك عليها بإنه مطلق مراته الأولى. الموقف اتعقد أكتر على محمود، وبقى محاصر بين قضية النصب وخيانة الأمانة من ناحيتي، وقضية تدليس من ناحية مراته الثانية، وقضية الخلع اللي رفعتها عليه في محكمة الأسرة. بعد أسبوعين من الحبس الاحتياطي وتجديده، أهله جوم لحد باب شغلي، أبوه الراجل الكبير اللي كان مطنشني طول السنين اللي فاتت، جيه يمسك إيدي ويبكي قدام زمايلي في العمل: "يا بنتي ارحمي شيبتي، محمود هيضيع ومستقبله هيروح، قولي شروطك وإحنا هنفذها حرفياً بس تنازلي عن القضايا وتطلعيه من السجن! "وقفت قدام أبوه وقلتله بصوت حاسم: "شروطي مفيهاش تنازل عن قرش واحد. الشقة تتسجل باسمي بالكامل في الشهر العقاري، والمليون و300 ألف ينقص منهم قيمة الشقة والباقي يتردلي كاش، بالإضافة لتطليقي رسمياً وبدون فصال.. غير كده، ابنك هيكمل عقوبته في السجن. "أبوه وافق وهو مكسور، وبدأوا يجروا في إجراءات نقل ملكية الشقة ليّ وتدبير باقي المبلغ عشان يخلصوا ابنهم من الحبس قبل ما يتأيد عليه حكم نهائي. لكن وأنا برتب الأوراق مع المحامي عشان نستلم الشقة ونضمن باقي الفلوس، المحامي اكتشف مفاجأة ثقيلة ومحسوبة في العقود القديمة للشقة، مفاجأة تقلب الترابيزة كلياً وتثبت إن محمود كان مخطط للموضوع ده من قبل ما بابا الله يرحمه يتوفى اصلاً! المفاجأة كانت زي الصاعقة اللي نزلت على دماغي ودماغ الأستاذ رفعت المحامي. وأحنا بنراجع أوراق الشقة والعقود المسجلة عشان نعمل إجراءات التنازل ونقل الملكية رسمياً في الشهر العقاري، المحامي دقق في تواريخ عقود الابتدائي السابقة وتاريخ تسلسل الملكية للعين دي بالذات. اكتشفنا إن الشقة ما اتشرتش في الأسبوعين اللي اختفى فيهم محمود زي ما ادعى! العقد الابتدائي ودفعت العربون والتسجيل المبدئي باسم محمود معمولين من ست شهور فاتوا... يعني من قبل ما بابا الله يرحمه يتوفى بأربعة أشهر كاملين! محمود كان متفق مع السمسار والمالك القديم على شراء الشقة بالتقسيط، وكان دافع مقدم بسيط من معيشته الناشفة اللي كان بيعيشهالي، وكان حاطط شرط جزائي ضخم جداً لو كسر العقد وما سددش باقي المبلغ (المليون و300 ألف) في ميعاد محدد. الميعاد ده كان بيقرب، ومحمود ما كانش حيلته مليم، وكان مهدد بالحبس والشرط الجزائي وخراب بيته من مراته الجديدة اللي كان متفق معاها على الجواز أول ما يستلم الشقة. وفجأة، بابا توفاه الله، وظهرت المليون و950 ألف جنيه بتوع الورث!هنا الص الصورة اتضحت كاملة قدام عيني. . المعاملة الطيبة، الدخلة بالأكل اللي بحبه، نبرة الحنية المزيفة، الزن والنكد والعذاب النفسي، وتهمة "الخيانة وعدم الثقة" لما طلبت حقي يتكتب باسمي... كل ده كان مسرحية ملعوبة بدقة متناهية. محمود ما كانش بيفكر يتاجر ولا يستثمر، محمود كان بيمو. ت من الخوف من السجن والفضايح، واستغل مو. تي العاطفي وحزني على بابا عشان ينقذ رقابته بفلوسي، ويفرش عش الزوجية لغيري! الأستاذ رفعت بصلي وابتسم ابتسامة ثقة وقال لي: "القضية اتغيرت تماماً يا أمل. ده مش مجرد استيلاء أو خيانة أمانة بس، ده سبق إصرار وترصد وسوء نية مثبت بالتاريخ والورق. محمود كده ممسوك في قضية توثيق عقود وهمية وتدليس مكتمل الأركان. بالورق ده، أحنا مش بس هنحسب الشقة وباقي الفلوس، أحنا نقدر نرفع قضية تعويض بمبلغ وقدره عن الأضرار النفسية والمادية، والشرط الجزائي بتاع العقد القديم هيتلبس هو فيه مش أنتِ."تاني يوم، طلب المحامي جلسة تجديد عاجلة أمام قاضي المعارضات، واستدعينا المالك الأصلي للشقة والسمسار لمواجهتهم بالتوارخ الجديدة. المالك الأصلي لما شاف الورق وبند التهديد بالسجن، اعترف فوراً قدام النيابة: "يا باشا أنا ماليش دعوة، الأستاذ محمود جالي من 6 شهور واتفق معايا واشترى بالتقسيط، وقال لي أول ما يجيلي مبلغ كبير هسدد باقي الثمن كاش ونكتب العقد النهائي، وهو اللي جاب الفلوس كاش وقال إنها أرباح شغله. "محمود كان قاعد في القفص، وشه زايغ، وعينيه رايحة جاية بيني وبين المالك والسمسار. لما القاضي واجهه بالتوارخ وبعقد الشراء القديم وبصدمة النيابة فيه، محمود انهار بالكامل على ركبه جوة القفص، وبدأ يصرخ بصوت هستيري: "والله ما كان قصدي أسرقها! أنا كنت غرقان وكنت هروح في داهية وستات تانية كانت بتهددني! أنا قلت هاخد الفلوس أفك زنقتي وبعدين أبقى أردها لها بالراحه من شغلي! يا أمل سامحيني عشان خاطر ألم الأيام اللي كانت بينا!"صرخاته كانت بتملا القاعة، بس قلبي كان عبارة عن حجر صوان. بصيتله وقلت للنيابة بصوت ثابت: "أنا بطلب تطبيق أقصى عقوبة على المتهم، وبدفع بوجود النصب المقترن بسوء النية والتدليس."الزوجة الثانية لما عرفت إن العقد القديم من 6 شهور، وإن محمود كان بيمثل عليها هي كمان إنه غني وبيشتري كاش، اتجننت ورفعت عليه قضية خلع وتزوير، وجت للمحامي بتاعي وشهدت معاي إنها ما كانتش تعرف مصدر الفلوس وإن محمود خدعها وأوهمها إنه مستثمر عقاري. أهل محمود اتزنقوا في أضيق نقطة، وبقوا شايفين ابنهم محبوس ومش بس مهياخدش الشقة، ده مستقبله الوظيفي انتهى كلياً لو صدر حكم نهائي. أبوه وأخته جوم للمرة الأخيرة، وجابوا معاهم محامي عيلتهم، وقعدوا مع الأستاذ رفعت. المحامي بتاعي حط الشروط على الطاولة وبشكل غير قابل للتفاوض:أولاً: تنازل نهائي وموثق بالشهر العقاري عن الشقة بالكامل لصالحي، بعقد بيع نهائي ومسجل باسمي أنا فقط. ثانياً: رد باقي المبلغ (كل مليم اتقطع من المليون و300 ألف جنيه) كاش وفي أسبوع واحد فقط، بعيداً عن قيمة الشقة. ثالثاً: إيقاع الطلاق الرسمي والنهائي وبإرادته في الشهر العقاري وبدون اللجوء لمحكمة الأسرة مع تنازلي عن مؤخر الصداق فقط لا غير. رابعاً: دفع مبلغ تعويض مالي عن كافة المصاريف القضائية والأضرار النفسية اللي تسبب فيها. أبوه حاول يناهد ويقول: "نجيب منين باقي الفلوس كاش في أسبوع؟ ده كدة خراب بيت!"رد الأستاذ رفعت ببرود: "تبيعوا أرضكم، تبيعوا ذهبكم، تتصرفوا.. وإلا ابنكم حكمه جاهز بـ 3 سنين سجن مشدد مع الشغل والنفاذ وتجريده من وظيفته الحكومية. "محمود من جوة السجن، لما عرف البنود وشاف إن مفيش مفر وإن زمايله في العمل بدأوا يعرفوا بالموضوع والرفض من الخدمة بقا مسألة أيام، بعت رسالة مع أخته بيترجى ويترجاهم يبيعوا أي حاجة ويخلصوه قبل ما الجلسة الجاية تتقفل عليه. بدأت عيلته تتسابق مع الوقت، باعوا حتة أرض كانت حيلتهم في البلد، وأخته باعت ذهبها، عشان يجمعوا باقي الكاش. وأنا كنت واقفة من بعيد، متابعة كل خطوة، شايفه القرش اللي حاول يستقوى بيه عليا وهو بيتقلب لعنة وخراب عليه وعلى كل اللي ساندوه في ظلمه. وفعلاً، بعد أسبوع من الرعب والضغط النفسي عليهم، اتحدد يوم التوقيع في الشهر العقاري وأمام وكيل النيابة لإتمام الصلح المشروط واسترداد باقي الحقوق... لكن لحظة التوقيع بالذات شهدت مفاجأة أخيرة ما كانتش في الحسبان!في مكتب موثق الشهر العقاري، كان الجو مشحوناً بالتوتر والصمت الخانق. محمود جابه الحرس من المحبس، وشه شاحب، وتحت عينيه هالات سودة، والكلبشات في إيديه. والده كان قاعد مكسور ومحني الظهر، وبجوارهم الأستاذ رفعت محاميّ وهو مراجع كل العقود وإيصالات الاستلام والكاش اللي تم تجميعه. المفاجأة الأخيرة اللي حصلت في لحظة التوقيع، إن محمود أول ما الموظف حط القلم في إيده عشان يوقع على التنازل عن الشقة ورقية الطلاق واسترداد باقي المبلغ، مسك القلم وإيده بترتعش، وبصلي بعيون مليانة دموع وكسرة وقال بصوت خافت: "أنا هوقع على كل حاجة يا أمل. .. بس سامحيني، أنا ضيعت نفسي وضيعتك معايا، والفلوس اللي فكرت هتحميني هي اللي ودتني في داهية."رديت عليه ببرود وثبات تام، ونظرة أبرد من الثلج: "التسامح ده عند ربنا يا محمود... لكن هنا في الدنيا، كل واحد بياخد جزاء أفعاله. أنت ما ضيعتنيش، أنت قويتني وعرفتني قيمتي وقيمة شقا بابا الله يرحمه."وقع محمود على عقد البيع النهائي للتنازل عن الشقة بالكامل لصالحي، ووقع على وثيقة الطلاق الرسمي وبإرادته الكاملة، وسلّمني محامي عيلته باقي المبلغ الكاش (المليون و300 ألف جنيه اكتملوا تماماً بعد تقييم الشقة ورد الباقي نقدياً) بالإضافة لمبلغ التعويض عن الأضرار والمصاريف القضائية. بمجرد إتمام التوقيعات وتسليم المبالغ والتأكد من صحتها، قدم الأستاذ رفعت إقرار التنازل عن الشق الجنائي للمحكمة والنيابة بناءً على الصلح المشروط واسترداد كافة الحقوق المالية والعقارية. صدر القرار بإخلاء سبيله، لكن الخسارة كانت كاملة ومكتملة الأركان بالنسبة له:خسر الشقة، خسر الفلوس، خسر زوجته الثانية اللي خلعته وفضحته، وصدر قرار إداري من جهة عمله بنقله وتأديبه بعد الفضيحة والقضية، ورجع لبيت أهله صفر اليدين، مكسور الخاطر والكرامة، ومحمل بديون أهله اللي باعوا أرضهم عشان يخرجوه من السجن. أما أنا، فخرجت من الشهر العقاري وأنا حاسة بإن جبل ثقيل انزاح من على صدري. اتنفست بحرية ولأول مرة من سنين حسيت بأمان حقيقي. رجعت على الشقة الجديدة—الشقة اللي كان فاكر إنه هيعيش فيها على قفايا ومجهودي—استلمتها رسمياً، وغيرت ديكوراتها بالكامل، وبعت عربيتي القديمة واشتريت العربية اللي كان نفسي فيها من زمان. أما باقي الورث والفلوس اللي استرديتها بالكامل، فحطيتها في استثمارات آمنة وباسمها هي فقط في البنك، وبقيت أدير حياتي بذاتي وبمنتهى القوة والاستقلالية. بقيت أروح شغلي كل يوم وراسي مرفوعة، مش خايفة من نكد ولا زن ولا استغلال، وعرفت إن الورث الحقيقي اللي سابهولي بابا الله يرحمه مش بس المليون و950 ألف جنيه. .. الورث الحقيقي كان الدرس اللي خلاني أعرف أقف على شغلي وأحمي نفسي وأكون ست قوية ما تتكسرش أبداً. تمت.#الكاتب_رومانى_مكرم_