حلم الدكتوره
بصيت له وأنا مش فاهم، قلبي بيدق بسرعة، ومخّي مش قادر يستوعب… واحد لسه من شوية كان بيهزقني قدام الناس، جاي دلوقتي يشكرني؟
قلت له ببرود وأنا واقف على الباب: ـ “تشكرني؟ على إيه إن شاء الله؟”
يحيى أخد نفس عميق، وبص لنور اللي كانت واقفة ورا منه مكسورة، وقال: ـ “على إنك راجل… وعلى إنك عملت اللي قليل أوي يعمله.”
سكت شوية وكمل: ـ “أنا امبارح بعد ما مشيت… سألت نور… قولتلها مين ده؟ وإزاي الأسطى يكلمك كده؟ ساعتها… هي حاولت تتهرب… بس أنا ضغطت عليها.”
نور انفجرت في العياط وقالت بصوت متقطع: ـ “أنا قولتله الحقيقة… قولتله إنك أخويا… وإنك اللي ربتني… وإنك اللي ضحيت بكل حاجة عشاني…”
حسيت الأرض بتميد بيا… بصيت لنور، كانت أول مرة أشوفها بالشكل ده… ضعيفة… مكسورة… مش الدكتورة المتعالية اللي شفتها امبارح.
يحيى كمل كلامه وهو باصص لي مباشرة: ـ “أنا اتربيت في بيت فيه فلوس… آه… بس عمر ما كان فيه جدعنة زي اللي أنت عملته. بصراحة؟ أنا كنت شايف نفسي… بس امبارح أنت كسرتني.”
سكت لحظة وقال: ـ “ولما عرفت الحقيقة… أنا اللي اتكسفت من نفسي… مش منك.”
نور قربت خطوة مني وهي بتترعش: ـ “حسن… أنا غلطت… أوي… أنا كنت خايفة… خايفة شكلي قدامهم… قدام خطيبي… قدام زمايلي…”
قاطعتها وأنا بصوت هادي بس موجوع: ـ “فبعتي أخوكي؟”
دموعها نزلت أكتر: ـ “أنا مابعتكش… أنا كنت غبية… افتكرت إن المكانة بالشكل… مش بالأصل… نسيت إن كل اللي أنا فيه… أنت السبب فيه…”
أمي كانت واقفة ورايا، بتسمع كل كلمة، ودموعها ساكتة بتنزل.
يحيى بص لأمي باحترام وقال: ـ “أنا جاي كمان أطلب إذنك يا حاجة…”
أنا استغربت: ـ “إذن إيه؟”
قال بحزم: ـ “إذن أكمل مع نور… بس بشرط.”
نور بصت له بخضة: ـ “شرط إيه؟”
قال وهو بيبص لها نظرة جد: ـ “إنك ترجعي نور اللي كانت بتحب أخوها… مش اللي بتكسف منه. لأن أنا مستحيل أكمل مع واحدة تكسف من أصلها.”
سكتت الدنيا لحظة… كلنا مستنيين ردها.
نور مسحت دموعها وبصت لي: ـ “أنا هرجع… وهثبت لك… بس سامحني يا حسن… عشان خاطري…”
بصيت لإيدي… نفس الإيد اللي كانت بتتكسف منها… وافتكرت كل حاجة… التعب… السنين… ضحكتي وأنا بقول “كله يهون عشان الدكتورة”…
رفعت عيني عليها وقلت: ـ “السماح مش كلمة… السماح موقف.”
قربت منها خطوة: ـ “لو فعلاً ندمانة… يبقى مش قدامي أنا… قدام نفسك… وقدام أمك.”
