عاشق ياقوت

لو سمحت قطر سوهاج هيطلع امتى؟؟
_ قدامه ربع ساعة وطالع..
_ شكرا.
مستنتش حتى يرد وجريت على شباك التذاكر وأنا بقطع تذكرة بسرعة، طلعت أدور على الرصيف وأنا جسمي كله بيرتعش.. حاسة أن بتحرر من السجن اللي كنت عايشة فيه وأخيرا دخلت القطر!
قعدت مكاني وأنا بأخد نفسي بسرعة.. من امبارح بليل وأنا بحاول أبعد تماما عن بيتي وبلدي وأي مكان ممكن حد يعرفني فيه.
لحد ما قررت أني أروح بلد بعيدة .. أيديهم مطولنيش فيها ولا يعرفوا مكاني بعد كام يوم من هروبي..
كنت اتعرفت على واحدة عن طريق الفيس بوك من سوهاج وهي اللي شجعتني أروحلها على الأقل لما أبعد عن القاهرة وكل معارفي فيها مش هيعرفوا مكاني!!

كنت قاعدة بفرك في أيدي ومتوترة لحد ما القطر بدأ يطلع وبدأت أهدأ وفجأة اتفاجأت بالشخص اللي قعد جنبي!!!

_ هو حضرتك مكانك هنا؟
_أيوة في حاجة؟
_ لا لأ

كنت بدعي ربنا ميقعدش جنبي راجل لأني هتوتر أكتر، وهكون خايفة طول الطريق.. وأنا منمتش من إمبارح ومحتاجة أنام!! لكن الحظ محالفنيش لما الشخص دا قعد جنبي..
عملت نظرة سريعة على القطر لقيته كله مليان، بصيت على الشخص اللي قاعد جنبي تاني.. كان باين عليه هادي وشخص محترم فطمنت نفسي شوية..

_ أول مرة تروحي سوهاج؟

بصيتله ومردتش كنت عارفة أنه أخد باله إني ببص عليه كتير فبصيت قدامي بسرعة من غير ما أدي أي رد فعل..

كمل كلامه:
_ أنا آسف لو بتطفل بس أنتي باين عليكي متوترة!

بصيتله تاني من غير ما أتكلم وبعد كدا بصيت للشباك، من جوايا عايزة أرد يمكن التوتر يقل لما أتكلم مع حد .. لكن مكنتش عايزة أفتح حوار مع حد نهائي لحد ما أوصل.. وكدا أفضل
الموبايل فجأة اتهز جوا الشنطة.. جسمي ارتعش واتخضيت وأنا بطلعه بسرعة والتوتر بان عليا أكتر.. أنا فاكرة إني عملاه airplane mode لحد ما أشتري خط جديد بدل اللي فيه، فمن التوتر طلعت الشريحة بسرعة ورميتها من الشباك.

سمعت صوت ضحكته من جنبي _ أنتي هربانة من حكم عليكي ولا إيه؟
بصيتله بعصبية نسبية وبصيت قدامي..
_ طب خلاص خلاص متعصبيش نفسك .. بس على فكرة أي حد يقدر يعرف مكانك عن طريق الموبايل نفسه عادي جدا.

سكت شوية وأنا بفتكر هما إزاي بيقدروا يعرفوا مكاني بعد كل مرة بهرب فيها واكتشفت أن دا ممكن يكون السبب ف غمضت عيني وأنا برمي الموبايل من الشباك..