روحت المطار علشان أودع صاحبه عمرى
دخلت ولقيت البيت ساكت. فتحت النور، ومشيت بخطوات وثيقة ناحية مكتب هشام.
أول حاجة عملتها، فتحت اللابتوب بتاعه. طبعاً الباسورد كان تاريخ ميلاده، الراجل الساذج ده فاكر إنه مكار. نزلت كل الملفات، الفواتير، الحسابات السرية لشركة “ريماس”، وكل الإيميلات اللي رايحة وجاية بينهم.
لقيت البلاوي.
هشام مكنش بس ناوي يسرق الشقة، ده كان سارق مبالغ ضخمة من عملاء الشركة، وحاطط اسمي كـ “ضامن متضامن” في عقود وهمية عشان لما الشركة تقع، الشواكش كلها تنزل على دماغي أنا، وهو يخلع مع ريماس على دبي أو دهب بالفلوس المغسولة!
سجلت كل حاجة على فلّاشة خارجية. وبعت كل التسجيلات الصوتية والفيديوهات اللي صورتهالهم في المطار لأستاذ كامل على الواتساب.
تليفوني رن.. كان أستاذ كامل.
رديت ببرود: “ألو.. أستاذ كامل؟”
جالي صوته الوقور اللي بيرجعلي الثقة: “نورهان يا بنتي.. أنا شفت الفيديوهات والتسجيلات. هشام وريماس دخلوا في زون الجريمة الكاملة. الورق اللي معاكي يوديهم في داهية، بس أنتِ نيتك إيه؟ ناوبة تروحي النيابة فوراً؟”
ابتسمت وأنا ببص لصورته هو وهشام في الفرح المعلقة على الحيطة: “لا يا أستاذ كامل.. النيابة دي المرحلة الأخيرة. أنا عايزة هشام يتصفى الأول، عايزاه يدوق طعم الخسران نقطة نقطة. عايزة أما يقف قدامي، يفهم إن العبيطة اللي كان بيضحك عليها، هي اللي قطعت رقبة أحلامه.”
أستاذ كامل ضحك بصوت واطي: “رحمة الله عليك يا عادل.. سبت وراك وحش. طب قوليلي الخطة إيه؟”
“بكرة الصبح هينفذ خطوته بتاعة قفل الحسابات وطلب القرض بضمان الشقة. أنا عايزك تسيب المحامي بتاعه يرفع الطلب في البنك، وقبل ما البنك يوافق بساعة.. نتدخل.”
“تم يا بنتي. أنا محضر كل الأوراق والشهر العقاري جاهز. الساعة كام هييجي البيت؟”
“قال لـ ريماس هييجي النهاردة بالليل عشان يخليني أمضي على ‘آخر ورقة’.”
“تمام.. خليكي هادية، وماتظهريش أي حاجة.”
قفلت مع أستاذ كامل. ودخلت الحمام، غسلت وشي بمية ساقعة، وحطيت مكياج خفيف، ولبست روب دافي، وقعدت في الصالة أشرب كركديه روقان.
الساعة جابت 11 بالليل.
سمعت صوت المفتاح في الباب.
قلبي هدئ تماماً.. اللحظة جات.
دخل هشام، شكله كان مجهد تصنعاً، حاطط الشنطة الجلد على الترابيزة، ولابس وش الزوج المحب المغصوب على أمره.
