اول ماطلعت النتيجه
في اللحظة اللي إيد منير اتحركت فيها، كان الكان دقيق ومشدود لدرجة إننا كنا سامعين صوت أنفاسنا. رفعت كان باصص للورقة اللي في إيد المحامي وهو بيقرأ البند اللي “منير” كتبه بخط إيده: “تُنقل كافة صلاحيات الإدارة والتصرف في أسهمي لزوجتي ‘زهرة’ بصفتها الوصية على ابني ‘ياسين’، ويُمنع أخي رفعت الجبالي من دخول مقر الشركة أو التدخل في الحسابات البنكية فور ثبوت نسب ياسين رسمياً”.
رفعت صوت نفسه بقى عالي، وبدأ ينهج كأنه غرقان، وبص للمحامي وزعق: “الورقة دي مزورة! منير ما يعملش كدة في أخوه!”
المحامي رد عليه بهدوء قاتل: “دي ورقة موثقة في الشهر العقاري يا رفعت بيه، ومنير بيه كان واعي جداً وهو بيمضيها.. وكأنه كان عارف إنك أول واحد هتنهش في لحمه ولحم ابنه وهو غايب.”
وفجأة، صوت جهاز ضربات القلب بدأ يسرع.. تيت.. تيت.. تيت..
عيني راحت على السرير، وشفت صوابع منير وهي بتضغط على الملاية بقوة. جريت
عليه وأنا بصرخ: “دكتور! منير بيتحرك! يا منير.. رد عليا يا حبيبي!”
الممرضات دخلوا يجروا، والدكتور زق رفعت اللي كان واقف مذهول ومكسور قدام الورقة اللي ضيعت منه “مملكة الجبالي” في ثانية. خرجونا كلنا بره الأوضة، ووقفت أنا وياسين ابني، اللي صحي على الصوت ودموعه في عينه، وماسك في عبايتي وهو مش فاهم حاجة.
رفعت قرب مني، ملامحه كانت مرعبة، ميكس بين الغل والخوف، وهمس بصوت واطي: “فاكرة إنك كسبتي؟ الورقة دي هطيرها برقبتك يا زهرة.. والجبالي مش هيديرها واحدة زيك.”
بصيت له بكل قوة، ومسحت دموعي، وقلت له: “اللي زيك يا رفعت ما يعرفش يعني إيه راجل يأمن بيته وهو عايش عشان يحميهم وهو ميت.. منير ما كنش خايف من الغريب، كان خايف منك إنت! ودلوقتي، اتفضل اخرج بره المستشفى، لأن أمن الشركة استلم تعليمات بمنعك من دخول أي مكان يخصنا.. حتى أوضة أخوك!”
في اللحظة دي، خرج الدكتور وعلى وشه ابتسامة هادية: “مبروك يا مدام زهرة.. الأستاذ منير فاق، وأول كلمة نطقها كانت ‘ياسين’.”
رفعت وقعت منه شنطته على الأرض، وبص للفراغ وهو عارف إن اللعبة انتهت. أما أنا، فخدت ياسين في حضني ودخلت لمنير، وأول ما عيني جت في عينه، عرفت إن “الجبالي” الحقيقي رجع، وإن “الورقة السرية” ما كانتش بس ورقة ميراث.. دي كانت طوق نجاة لقلب مخلص خاف على بيته من أقرب الناس ليه.
