اعقلي يامايا
اعقلي يا ماياأنا راجل متجوز من بنت خالتك، اللي مفروض تعتبريها أختك.
اطلعي بره عيادتي فورًا، أنا مش عايز مشاكل.
قربت مني وحاولت تمسك إيدي، بس أنا بعدت بسرعة، فعيطت وقالت:
_بس انت مبتحبهاش، انت عمرك ما حبيت روان. متكدبش على نفسك، روان كانت بديل ليا، انت عمرك ما حبيتها، انت…
رفعت راسي وقاطعتها وقلت:
حاسبي على كلامك! روان مش بديل، روان هي مراتي اللي اخترتها.
مراتي اللي وقفت معايا في أسوأ أحوالي، هي اللي بقت جنبي في الوقت اللي انتي وأبوكِ اتخليتوا عني وفسختوا الخطوبة، واتجوزتي اللي أغنى مني.
كنت في أسوأ أحوالي، وبدل ما توقفي جنبي، فسختي الخطوبة وأهنتيني، وقلتي إني مش راجل كفاية ومش هصرف عليكي.
نسيتي يا مايا؟ ها، قوليلي راجعة ليه بعد ما اتطلقتي؟ جاية دلوقتي للمغفل اللي حبك؟
بس خلاص يا مايا، أحب أقولك إني بطلت أحبك.
أنا حتى مبكرهكيش، لأن حتى كرهي كتير عليكي.
فياريت تطلعي برة عيادتي بالذوق، بدل ما أطردك وأمسح بكرامتك الأرض.
حسيتها اتوترت واتلجلجت، بس قالت قبل ما تمشي:
مش هستسلم يا إياد، وهفضل وراك لحد ما ترجعلي، لأني أنا وانت بنحب بعض، وروان ملهاش مكان في حياتنا.
شاورت بإيدي لبرا وقلت:
انتي اللي ملكيش مكان في حياتنا يا مايا.
لو سمحتي، اطلعي بره وكفاية، مش عايز أقل منك أكتر من كده.
طلعت من العيادة، فهزيت راسي، وأنا متيقن إن مايا مش هتهدى إلا لما تعمل فتنة بيني وبين روان.
روحت البيت وأنا تعبان، ولقيت روان مروقة بيتنا كالعادة، ونومت بنتي الصغيرة، ومستنياني بابتسامة حلوة خلت التعب ينزاح من عليا وجددت نشاطي.
قربت منها وبوستها على جبينها وقلت:
أنا هموت من الجوع.
ردت بعد الشر عليك يا عمري:
روح خد شاور، وأنا عملتلك مكرونة بالبشاميل وفراخ. كنت عاملهم على أساس نتغدى مع بعض، بس انت اتأخرت.
بصيت لها بصدمة وقلت:
متقوليش إنك متغدتيش؟
قالت:
انت عارف إني مبكلش من غيرك.
سكت وأنا ببصلها، وبفكر إن أحسن حاجة عملتها مايا إنها مشيت من حياتي، عشان ربنا عوضني بملاك زي روان.
بوست رأسها تاني وقلت:
هاخد شاور وناكل سوا.
خد دي من إيدي.
قالتها روان وهي بتحط حتة فرخة في بوقي، وكملت:
انت بتتعب، وأكلك خف.
أنا عارفة إني الفترة اللي فاتت قصرت شوية وأهملتك بسبب لجين، بس أوعدك مش هعمل كده تاني.
مسكت إيديها وقلت:
متقوليش كده، أنا اللي مقصر معاكي والله، فسامحيني.
عموماً، بس استني أسبوعين كده عشان أخلص الشغل اللي ورايا، وبعدين هنطلع مصيف سوا.
