اختاري
_اختاري الاوضه اللي تحبيها عشان هتبقى اوضتك من النهارده، كتمت دموعي بالعافيه ومشيت على أول اوضه قابلتني، قفلت الباب ورايا واول حاجه عملتها غيرت هدومي ودخلت خدت شاور واتوضيت عشان اصلي
صليت كتير وفي كل ركعه دموعي كانت بتنزل بغزاره
أحمد مش وحش بالعكس شخصية اي حد يتمني يتجوزها بس مش بالطريقه دي
احمد يبقي جاري من ٣ سنين تقريباً
شاب مُلتزِم، أزهري، محافظ على صلاته في المسجد
بل هو إمام المسجد أصلاً
محترم وجدع وكله يشهدله بكده
من فتره عرفنا ان والدته تعبانه ومحتاجه عملية قلب ضروري
لكن رفضت تعملها لحد ما تطمن عليه وتشوفه متجوز عشان كانت خايفه تدخل العمليات ومتطلعش!
وكأن مفيش قدامها غيري عشان تكلمه عليا وهو كلم بابا وعرض عليه الموضوع وفهمه كل حاجه وبابا كتر خيره متوصاش باعني ليه زي اي كرسي في البيت
مخادش رأيي حتي! عارفه انه بيكرهني لأنه زوج ماما مش بابايا بجد، لكن ده يديه الحق يبيعني كده؟
اتجوزت في يوم وليله!
حد معرفهوش كويس، متعاملتش معاه قبل كده، حد مهتمش انه يبرر اللي عمله او يعتذر على الوضع حتى
كتبنا الكتاب عند والدته في المستشفى علي وعد ان في فرح كبير بعد كده بس طبعاً ده كان قدام والدته بس
أي حد ممكن يعرف انه كان بيقول كده عشانها بلا اي اعتبار ليا ولا للي كان نفسي فيه ولا لوجودي اصلا
الحاجه الوحيده اللي مهونه عليا هو ان ربنا معايا
بس غصب عني …. قلبي واجعني!
خلصت صلاه ونمت علي المصليه
مكنتش هعرف انام ولا اغمض غير هنا
كمية سكون عجيبه بالرغم من دموعي اللي بتنزل بصمت وحزني الا إني كنت مرتاحه
فكرة ان ربنا معايا وانه مش هيخذلني مهما الأمر طول كانت مُطَمئِنه!
صحيت الصبح لقيت نفسي على السرير!
بأي حق يدخل من غير ما يخبط او يستأذن؟
سكتت لما افتكرت اني سمعت صوت خبط باليل بس من التعب دخلي في الحلم تقريباً
بس برضو ده ميديهوش الحق انه يدخل الاوضه ويشيلني!!
طلعت برا وانا ناويه اتخانق لقيته قاعد في الصاله وماسك مصحفه اول ما شافني صدق وقفل المصحف وقام وقف قدامي
قبل ما اتكلم اتكلم هو وهو باصص في الأرض
_انا آسف، عارف إنك متضايقه اكيد إني دخلت الاوضه و..
شيلتك يعني بس انا كنت جاي اصحيكي تصلي الفجر وقلقت لما لقيتك مبترديش عشان كده دخلت
ولما لقيتك نايمه علي المصليه عرفت إنك صليتي فبهدوء نقلتك على السرير وخرجت
أنا آسف والله
